Пинерти пĕтĕмĕшле пĕлÿ паракан тĕп шкулта нацисем тата конфессисем хушшинчи çыхăнăва çирĕплетессипе ĕçлекен канашăн ларăвĕ иртрĕ. Ăна Вăрмар муниципаллă округĕн пуçлăхĕ Василий Шигильдеев ертсе пычĕ. Ларăва Вăрмар округĕн депутачĕсен Пухăвĕн председателĕ Юрий Иванов, комисси членĕсем, Пинерти территори пайĕн пуçлăхĕпе специалисчĕсем, шкулти вĕрентекенсем, кунти культура ĕçченĕсем хутшăнчĕç.
Пинерти территори пайĕнче нацисем тата конфессисем хушшинчи çыхăнăва еплерех çирĕплетсе пынипе асăннă территори пайĕн пуçлăхĕ Мираида Симонова паллаштарчĕ. Вăл палăртнă тăрăх, Пинерти ял территорийĕнче 1126 çын пурăнать, вĕсенчен пиллĕкĕшĕ ытти наци çыннисем. Нацисем хушшинчи хирĕçтăрăва профилактикăлассипе ял тăрăхĕнче пурăнакансемпе, шкулти çул çитмен ачасемпе, ял çамрăкĕсемпе уçă калаçусем ирттереççĕ. Ял библиотекинче тĕрлĕ ÿсĕмри çамрăксемпе ырă, сывă пурнăç йĕркине тытса пырассипе, наркомание, пирус туртассине, эрех-сăра ĕçессине хирĕç кĕрешессипе тĕрлĕ мероприятисем йĕркелеççĕ. Культура ĕçченĕсем хатĕрленĕ тĕрлĕ мероприятисем çамрăксене пĕр-пĕринпе хутшăнма, кунта пурăнакан тĕрлĕ национальноç çыннисемпе тачăрах çыхăнма, пĕрле туслă пурăнма пулăшаççĕ. Çакна вара асăннă культура учрежденийĕн заведующийĕ Любовь Иванова та иккĕмĕш ыйтупа — нацисем тата конфессисем хушшинчи килĕшĕве çирĕплетессинче культура учрежденийĕсен ÿсĕмлĕхĕн темипе хатĕрленĕ докладĕнче уççăнах çирĕплетрĕ.
Вĕрентÿ учрежденийĕсенче вĕренекенсен хушшинче тăван çĕршыва, тăван тăрăха юратма, патриотизм туйăмне аталантарассине, культурăна, ытти халăхсен йăли-йĕркисене вĕрентсе пырассине çирĕплетессипе мĕнлерех ĕçсем пурнăçлани пирки шкул директорĕ Герман Боредский тухса калаçрĕ. Герман Станиславович палăртнă тăрăх, шкулта вĕренекенсене патриотла воспитани парассине уйрăмах пысăк тимлĕх уйăраççĕ. Çавна май кунта ятарласа музей те уçнă, кадет класĕ те йĕркеленĕ. Вĕренекенсем хушшинче патриотлăх туйăмне аталантарассипе тăтăшах тĕрлĕрен спорт вăййисем, занятисем йĕркелеççĕ.
Лару ĕçне Вăрмар муниципаллă округĕн пуçлăхĕ Василий Викторович Шигильдеев пĕтĕмлетрĕ. Кăçал, планпа килĕшÿллĕн, нацисем тата конфессисем хушшинчи çыхăнăва çирĕплетессипе ĕçлекен канаш пурĕ 7 ыйту пăхса тухнă. Нацисем хушшинчи çирĕплĕхе вăйлатассипе çулталăк хушшинче тĕрлĕ мероприятисем ирттернĕ: Акатуй, ял уявĕсем, Чăваш тĕррин кунĕ, Чăваш чĕлхин кунĕ, Славянсен культурипе çырулăх кунĕ тата ытти те. И.Н. Ульянов ячĕллĕ Чăваш патшалăх университетĕнче нацисем тата конфессисем хушшинчи çыхăнăва çирĕплетессипе ятарласа вĕрентÿ ирттернĕ. Унта Вăрмар муниципаллă округĕн культура, социаллă аталану тата спорт пайĕн специалисчĕ Ольга Федорова тата Кивĕ Вăрмарти библиотека заведующийĕ Алена Борисова вĕренсе квалификацие ÿстернĕ. Асăннă Канаш кăçал ятарлă çирĕплетнĕ планпа ĕçлесе пынă. Василий Викторович палăртнă тăрăх, малашлăхра округра пурăнакан кашни халăхăн йăли-йĕркисене вĕренсе пымаллине, мероприятисене чиркÿ настоятелĕсене те явăçтармаллине каларĕ. Унтан Канашăн 2026 çулхи ĕç планне çирĕплетрĕç.
Зинаида ПАВЛОВА
