«Физкультурăпа спорт аталанăвĕ» патшалăх программи шайĕнче Вăрмар поселокĕнчи «Илем» физкультурăпа спорт комплексĕн бассейнĕнче шывра ишессипе «Раштав старчĕсем» ăмăрту иртрĕ.
Спорт мероприятийĕн савăнăçлă пайĕнче спортсменсене ăнăçу сунса Вăрмар муниципаллă округĕн администрацийĕн культура, социаллă аталану тата спорт пайĕн начальникĕ А.Краснов, А.Ф.Федоров ячĕллĕ Вăрмарти спорт шкулĕн директорĕ Н.Павлов, И.Дмитриева тренер тухса калаçрĕç. Çавăн пекех шывра ишессипе Раççей спорт мастерĕн кандидачĕ Агафья Грачева сăмах илчĕ, ăмăртусене хутшăнакансене çĕнтерÿ тата хăйсен вăйне шанма сунчĕ. Палăртмалла, Агафья ăмăртусен судйин тивĕçĕсене те пурнăçларĕ.
Ăмăртусем интереслĕ иртрĕç, ишевçĕсем — И.Дмитриева, Ю.Григорьев, Н.Мелькова тата пурте асăмăрта упракан И.Алешин тренерсен воспитанникĕсем — хăвăртлăхĕпе тата ăсталăхĕпе тĕлĕнтерчĕç. Çĕнтерÿçĕсемпе призерсене медальсемпе тата грамотăсемпе чысларĕç, унсăр пуçне кашни спортсмена ăмăртусене хутшăннине çирĕплетекен сертификат пачĕç. Вăрмар райповĕ тата «Единая Россия» партин Вăрмарти уйрăмĕ çĕнтерÿçĕсене пылак парнесемпе тивĕçтерчĕç.
Ирина ДАНИЛОВА
