Хĕллехи каникул вăхăтĕнче Мăнçырма ялĕнче волейбол енĕпе урам командисем хушшинче турнир иртрĕ. Ăна Чăваш Республикин тава тивĕçлĕ вĕрентекенне, Мăнçырмари вăтам шкул директорĕнче нумай çул вăй хунă В.Д. Николаева асăнса йĕркеленĕ.
Мероприятие савăнăçлă лару-тăрура уçнă май турнира хутшăнакансен умĕнче саламлă сăмахсемпе Вăрмар муниципаллă округĕн администрацийĕн пуçлăхĕн пĕрремĕш заместителĕ О.Кошельков, Мăнçырмари территори пайĕн начальникĕ Н.Николаев, В.Д. Николаев ячĕллĕ Мăнçырмари вăтам шкул директорĕ Г.Васильев, Владимир Даниловичăн пĕртăванĕ З.Илларионова тата хĕрĕ Н.Михайлова тухса калаçрĕç, ăнăçу сунчĕç.
Турнира 8 команда хутшăнчĕ: «В.Д. Николаев ячĕллĕ Мăнçырмари вăтам шкулта вĕренекенсем», «В.Д. Николаев ячĕллĕ Мăнçырмари вăтам шкулта вĕрентекенсем», «Тăвансем», «Израиль», «Иштукан», «Студентсем», «Енкĕпĕç», «Ветерансем». Спорт мероприятийĕн пĕтĕмлетĕвĕ тăрăх «В.Д. Николаев ячĕллĕ Мăнçырмари вăтам шкулта вĕренекенсем» команда çĕнтерÿçĕ пулса тăчĕ. Çак команда спортсменĕсем çав тери ăста вылярĕç, пурте питĕ хастар пулчĕç. 2-мĕш вырăна «Студентсем» команда йышăнчĕ, 3-мĕш вырăна «В.Д. Николаев ячĕллĕ Мăнçырмари вăтам шкулта вĕрентекенсем» команда тухрĕ.
Çавăн пекех спортсменсене тĕрлĕ номинацисенче те палăртнă: «Самый юный игрок» — Роман Романов /10 çулта/, «Лучший игрок» — Кирилл Данилов, «Лучший блокирующий» — Дмитрий Семенов, «Лучший нападающий» — Вадим Матвеев, «Лучший связующий» — Тимофей Тимофеев.
Турнир чăннипех те спортпа туслăх уявĕ пулса тăчĕ. Ăна йĕркелесе ирттерме В.Д.Николаевăн тăванĕсем тата хĕрĕ Н.Михайлова активлă пулăшрĕç.
Сергей АРХИПОВ
