Вăрмар муниципаллă округĕнче Пĕрлехи информаци кунĕ иртрĕ. Ĕçлĕ ушкăнсем халăхпа тĕл пулса кун йĕркинчи ыйтусене сÿтсе яврĕç. Вĕсем çаксем: коммуналлă хытă каяшсене хĕллехи тапхăрта илсе тухса вырнаçтарасси, интернетпа усă курма вăхăтлăх чарни, терроризм идеологийĕ çамрăксем хушшинче сарăлнине çул пÿлесси, коммуналлă пулăшусемшĕн тÿлемелли хаксем, çулсене хĕлле юртан тасатса тăрасси, пушар хăрушсăрлăхĕ.
Вăрмар муниципаллă округĕн пуçлăхĕ Василий Шигильдеев ертсе пынă ушкăн Кивĕ Вăрмар ял тăрăхĕнче пулнă. Палăртмалла, информушкăн ĕçне Чăваш Республикин юстици ĕçĕсен патшалăх службин руководителĕ Дмитрий Сержантов та хутшăннă.
Вăрмар муниципаллă округĕн администрацийĕн пуçлăхĕн заместителĕ — строительство тата çул-йĕр хуçалăхĕн пайĕн начальникĕ Наталия Иванова ертсе пынă ушкăн Тикаш ял тăрăхĕнче ĕçленĕ. Вăрмар муниципаллă округĕн депутачĕсен Пухăвĕн председателĕ Юрий Иванов ертсе пынă ушкăн вара Чулкас ял тăрăхне çул тытрĕ.
Чулкас ял тăрăхĕнчи тĕлпулу ялти пĕтĕмĕшле пĕлÿ паракан вăтам шкулта иртрĕ. Территори пайĕн начальникĕ Георгий Усков пухăннисене Чăваш Енре коммуналлă хытă каяшсене вырнаçтарассипе «Ситиматик Чувашия» тулли мар яваплă общество ĕçленине аса илтерчĕ. 12 оператор коммуналлă хытă каяшсене илсе тухассишĕн яваплă, çав шутра Вăрмар округĕнче — «Водоканал» тулли мар яваплă общество. Чулкас ял тăрăхне кĕрекен 4 ялта 18 площадкăра контейнерсем лартса тухнă. Вĕсене вăхăтра пушатаççĕ, çав шутра уяв кунĕсенче те. Площадкăсем патне чăрмавсăр пыма юрне те хырса тăраççĕ. Юр тенĕрен, ял тăрăхĕнчи çул-йĕре вăхăтра тасатса якатасси ялан тимлĕхре. Ку тĕллевпе «Михайлов А.В.» уйрăм çын предпринимательпе килĕшÿ тунă, вăл хăйĕн тивĕçне яваплăн пурнăçлать.
Георгий Васильевич ял тăрăхĕнче пуçарулăх бюджечĕн программипе мĕнле проектсем пурнăçлама хатĕрленнине те уçăмлатрĕ: Анаткас ялĕнчи купеле хăтлăлатасшăн тата Чулкасри Шоссейная урамĕнчи шыв пăрăхĕсене çĕнетесшĕн.
Республикăра интернетпа вăхăтлăх усă курма мĕншĕн чарни пирки Вăрмар муниципаллă округĕн администрацийĕн пурлăх хутшăнăвĕсен пайĕн начальникĕ Ирина Васильева каласа пачĕ. Çапла тума федераци шайĕнче йышăннă, ку вăл хăрушсăрлăхпа, граждансене тата инфратытăм объекчĕсене хÿтĕлессипе çыхăннă. Интернета вăхăт-вăхăтпа чараççĕ пулин те «шурă списока» кĕнĕ сайтсемпе тата сервиссемпе чăрмавсăрах усă курма май пур. Списокпа РФ Цифра министерствин сайтĕнче паллашма пулать.
Вăрмар муниципаллă округĕн депутачĕсен Пухăвĕн председателĕ Юрий Иванов терроризм идеологийĕ çамрăксем хушшинче сарăлнин çулне пÿлессипе çыхăннă ыйтăва хускатрĕ. Терроризмла преступленисемшĕн тыттаракан явапа 2025 çултанпа хытарнă. Халĕ 14 çултанах уголовлă явап тыттарма, çитĕннĕ çынсене вара ирĕкрен ĕмĕрлĕх хăтарма пултараççĕ.
Тепĕр ыйтăвĕ — коммуналлă пулăшусемшĕн тÿлемелли хаксен улшăнăвĕ. 2026 çулта тарифсене икĕ тапхăрпа индексацилеççĕ — январĕн 1-мĕшĕнчен тата октябрĕн 1-мĕшĕнчен. Анчах республикăра пурăнакансен хăш-пĕр категорийĕсем коммуналлă тÿлевсемшĕн компенсаци, субсиди илме, тĕрлĕ çăмăллăхсемпе усă курма пултараççĕ. Нумай функциллĕ центрта, социаллă хÿтлĕх пайĕнче ку енĕпе халăха яланах пулăшаççĕ.
Округри надзорпа профилактика ĕçĕсен пайĕн аслă инспекторĕ Дмитрий Порфирьев пушар хăрушсăрлăхĕн ыйтăвĕ çинче чарăнса тăчĕ. Çулталăк пуçланнăранпа республикăра 61 пушар пулнă /округра — 1\, вĕсенче 5 çын вилнĕ, 10 çын шар курнă. Вут-çулăм тухасран çав тери сыхланмалла, кил-çуртра тĕтĕм тухнине систерекен автономлă хатĕр вырнаçтармалла.
Вăрмарти газ участокĕн участок мастерĕ Сергей Никифоров хутса ăшăтмалли тапхăрта газ оборудованийĕпе уйрăмах тимлĕ пулмаллине, тĕтĕм çулĕсем шăнса пăрланасран асăрханмаллине каларĕ. Раççей ял хуçалăх банкĕн Вăрмарти уйрăмĕн управляющийĕ Алевтина Максимова çăмăллăхлă кредитсем, сахал процентлă ипотека, инвестици продукчĕсем çинчен ăнлантарчĕ.
Информушкăн членĕсем Анаткас ялĕнчи клубра та пулса курчĕç, кунта маскировка сеткисем çыхакан активистсемпе тĕл пулса информаци кунĕн ыйтăвĕсемпе паллаштарчĕç.
Ирина ДАНИЛОВА
