Февралĕн 5-мĕшĕнче Чăваш Республикин Пуçлăхĕн Олег Николаевăн çулсеренхи пресс-конференцийĕ иртет.
Олег Николаев 7-мĕш хут ирттерекен пресс-конференци 2025 çулта пурнăçланă ĕçсене пĕтĕмлетмелли лапам пулса тăрĕ. Журналистсемпе калаçнă май республика Пуçлăхĕ иртнĕ çулхи тĕп çитĕнÿсем çинчен тĕплĕн каласа парĕ, регион аталанăвĕн тĕп çул-йĕрне палăртĕ, çав шутра республикăн социаллă тата экономика аталанăвĕн 2030 çулчченхи Комплекслă программи мĕнле пурнăçланса пыни çинче чарăнса тăрĕ, унсăр пуçне обществăри тата политикăри тĕп процессене хак парĕ.
Пресс-конференци 11:00 сехетре пуçланать. Ăна Чăваш наци телекуравĕн, «ЮТВ» телеканалăн тÿрĕ эфирĕнче, Чăваш Ен Пуçлăхĕн Олег Николаевăн «Вконтакте» социаллă сетĕнчи страницинче курма, Чăваш наци радиовĕпе итлеме пулать.
«Чувашинформ» тата «Хыпар» ресурссем пресс-конференцин текстне вырăсла тата чăвашла трансляцилесе пырĕç.
