Вăрмар округĕнче пысăк пĕлтерĕшлĕ мероприяти — ашшĕ-амăшĕсен муниципалитет шайĕнчи форумĕ — иртнĕ. Ăна Г.Е. Егоров ячĕллĕ Вăрмарти пĕтĕмĕшле пĕлÿ паракан вăтам шкулта йĕркелесе ирттернĕ.
Форум тĕллевĕ — çамрăксене хăйсен тăван тăрăхĕнчи ял хуçалăх территорийĕсене аталантарма явăçтарасси. Ку тĕллеве пурнăçлас тесен шкул ачисене пулас профессине суйлама тата пурнăç çулĕн стратегине палăртма пулăшмалла. Форум Раççей çамрăкĕсене аталанма тата пурнăçра хăйсен вырăнне тупма пулăшассипе пурнăçланакан «Çамрăксем тата ачасем» наци проекчĕн пайĕ пулса тăнă. Çак проект шайĕнче çамрăксене обществăлла пурнăçа активлă хутшăнтарассипе тата вĕсен гражданла позицине йĕркелессипе çыхăннă пуçарусене пысăк тимлĕх уйăраççĕ.
Форум вăхăтĕнче кашни хăйĕн шухăшне палăртма, шкул ачисене професси суйлама пулăшас сферăри опычĕпе паллаштарма пултарнă, ял территорийĕсене аталантармалли проектсене те сÿтсе явнă.
Мероприяти программине темиçе енлĕ йĕркеленĕ. Шкулти холл ачасемпе вĕсен ашшĕ-амăшĕсене куравсемпе, интерактивлă презентацисемпе кĕтсе илнĕ, кунтах практика занятийĕсем иртнĕ. Форума хутшăннă хăнасем пухăннисен умĕнче саламлă сăмахсемпе тухса калаçнă, çавăн пекех концерт та пулнă.
Пленарлă пай хыççăн ĕç малалла тĕрлĕ тематика секцийĕсенче тăсăлнă: «Ачапа психологи тĕлĕшĕнчен хутшăнасси», «Бизнес-революци», «Шкул ачисен профориентацийĕ тата хăйсен вырăнне тупма пулăшмалли хальхи йышши мелсем», «Агронавигатор».
И.Н. Ульянов ячĕллĕ Чăваш патшалăх университечĕн, Мускаври автомобильпе çул-йĕр патшалăх техника университечĕн Атăлçири филиалĕн, Чăваш педагогика колледжĕн, Çĕрпÿри аграрипе технологи техникумĕн Сĕнтĕрвăрринчи структурăллă уйрăм подразделенийĕн представителĕсем вĕрентÿ учрежденийĕсене вĕренме кĕмелли условисемпе, вĕрентÿ процесĕпе паллаштарнă, практика мĕнле иртни тата малалла ĕçе вырнаçасси пирки ăнлантарнă. Шкул ачисене хумхантаракан ыйтусем çине хуравланă.
«Пĕтĕмĕшле пĕлÿ паракан учрежденисен руководителĕсен лапамĕ» интереслĕ мастер-класс та йĕркеленĕ.
Пĕтĕмĕшле илсен, форум педагогсемшĕн, ашшĕ-амăшĕсемшĕн, бизнеспа аслă вĕренÿ заведенийĕсен представителĕсемшĕн пĕр-пĕринпе калаçмалли тухăçлă лапам пулса тăнă. Шкул ачисем вара хăйсен пуласлăхĕ çинчен тарăнрах шухăшласа илме, тĕрлĕ профессисем пирки ытларах пĕлме пултарнă.
Валентина ТАБАКОВА, Г.Е.Егоров ячĕллĕ Вăрмарти вăтам шкул директорĕн заместителĕ
