Çулсеренхи пекех кăçал та пĕтĕм çĕршыв йĕлтĕр йĕрĕ çине тăрса чăн-чăн спорт уявне - «Раççей йĕлтĕр йĕрĕ – 2026» ăмăртăва хутшăнчĕ. Чăваш Республикинче пурăнакансем те, çав шутра вăрмарсем те, савăнăçлă мероприятинчен айккинче юлмарĕç.
Пĕтĕм Раççейри «Раççей йĕлтĕр йĕрĕ – 2026» массăллă йĕлтĕр ăмăртăвĕ пирĕн çĕршывра хĕллехи тĕп спорт мероприятийĕ шутланать. Чăваш Республикинче ăна 2005 çултанпа кашни çул ирттереççĕ. «Пурте пĕрле старта тухса эпир спорт, сывлăх, пĕрлĕх патне ăнтăлнине çирĕплететпĕр. Раççейри халăхсен пĕрлĕхĕн çулталăкĕнче тата Чăваш Енри халăхсен туслăхĕн çулталăкĕнче йĕлтĕр йĕрĕ çине пирĕн аслă шкулсенче вĕренекен ют çĕршыв студенчĕсем тăни уйрăмах савăнтарать — спорт чăннипех пурне те пĕрлештерет», — палăртса каланă Чăваш Республикин Пуçлăхĕ Олег Николаев Шупашкар хулинче иртнĕ тĕп стартра.
Вăрмар округĕнче спорт мероприятийĕ Вăрмар поселокĕнчи тĕп стадионта иртрĕ. Пухăннисен умĕнче саламлă сăмахсемпе Вăрмар муниципаллă округĕн пуçлăхĕн тивĕçĕсене вăхăтлăх пурнăçлаканĕ Олег Кошельков, Вăрмар муниципаллă округĕн депутачĕсен Пухăвĕн председателĕ Юрий Иванов тата депутачĕ Геннадий Егоров, Вăрмар муниципаллă округĕн администрацийĕн культура, социаллă аталану тата спорт пайĕн начальникĕ Александр Краснов, ЧР Патшалăх Канашĕн депутачĕ, «Единая Россия» партин «Ача-пăча спорчĕ» проекчĕн регионти координаторĕ Леонид Пронин, ЧР Физкультурăпа спорт министерствин представителĕ Татьяна Илларионова, ЧР Хĕрарăмсен Союзĕн Вăрмарти уйрăмĕн председателĕ Валентина Волкова тата ыттисем те тухса калаçрĕç. Вĕсем спортсменсене, активлă канăва кăмăллакансене, сывă пурнăç йĕркине тытса пыракансене çĕкленÿллĕ кăмăл-туйăм, хавхалану, финиша малтисен ретĕнче тухма ăнăçу сунчĕç, малашне те спортпа туслă пулма чĕнсе каларĕç. Çавăн пекех мероприятие чыслав саманчĕ пуянлатрĕ. Вăрмар округĕн обществăлла тата политика пурнăçне хастар хутшăнакан активистсем «Единая Россия» партин Чăваш Енри уйрăмĕн Тав çырăвĕсене тивĕçрĕç.
Ăмăртусенче халăх йышлă пулчĕ — ача садне çÿрекеннисенчен пуçласа спорт ветеранĕсем таран. Чи çамрăк йĕлтĕрçĕ 3 çулта, чи асли 87-ре пулнине палăртрĕç. Йăлана кĕнĕ йĕркепе чи малтан VIP-чупу иртрĕ, унтан массăллă старт пулчĕ, малалла шкул çулне çитмен ачасем ăмăртрĕç, кайран вара йĕлтĕрçĕсем ÿсĕмне кура чупрĕç.
Кашни чупу çивĕч пулчĕ. Кам çил пек хăвăрт вĕçтерет, кам майĕпенрех, анчах кашни йĕлтĕрçĕ хăйĕн дистанцине ăнăçлă парăнтарчĕ. Судьясем финиша кам миçемĕш çитнине палăртса пычĕç. Яваплă çынсем мала тухнă спортсменсене медальсемпе, грамотăсемпе тата парнесемпе чысларĕç. Унсăр пуçне йĕлтĕр йĕрĕ çине тăнă ача сачĕсен воспитанникĕсем финиша çитсен пурте пылак парнесене — шоколада — тивĕçрĕç. Пĕчĕк спортсменсене савăнтарма Вăрмар райповĕ спонсорла пулăшу кÿнĕ.
Спорт уявĕ çÿллĕ шайра иртрĕ. Вăрмарти Г.Е.Егоров ячĕллĕ вăтам шкул волонтерĕсем пурне те вĕри чейпе, «Общепит» тулли мар яваплă общество пĕçерекен тутлă пĕчĕк кукăльсемпе сăйларĕç. Медицина ĕçченĕсем ăмăртăва хутшăнакансем хăйсене мĕнле туйнине тимлесе тăчĕç. Право хуралĕн сотрудникĕсем вара мероприятинчи хăрушсăрлăха тивĕçтерчĕç.
Сăмаха май, спорт мероприятийĕнчи сăн ÿкерчĕксемпе «Хĕрлĕ ялав» хаçатăн Контактри страницинче туллин паллашма пултаратăр.
Ирина ДАНИЛОВА
