В.Д. Николаев ячĕллĕ Мăнçырмари пĕтĕмĕшле пĕлÿ паракан вăтам шкул Хусанти командирсем хатĕрлекен аслă танк училищи 107 çул тултарнине халалланă конкурса ăнăçлă хутшăнчĕ.
Пĕтĕмпе конкурса çĕршыври сакăр шкул хутшăнса хăйсем хатĕрленĕ видеороликсемпе паллаштарнă, вĕсенче çак паллă вĕренÿ заведенийĕн историйĕ, йăли-йĕрки тата выпускникĕсем — Раççей Геройĕсем — çинчен каласа панă.
Мăнçырма шкулĕн видеороликĕнче Хусанти командирсем хатĕрлекен аслă танк училищине 107 çул тултарнă ятпа саламланă, Мăнçырма шкулĕн тата Хусанти танк училищин выпускникне, Раççей Геройне тата Приморье Геройне Сергей Юрьевич Ильина, унăн паттăр ĕçĕсене ырăпа аса илнĕ. Онлайн-сасăлавра çак видеороликшĕн сасăлакансем нумай пулчĕç, çавăнпа Мăнçырма шкулĕ куракансен симпатийĕн призне çĕнсе илме пултарчĕ, çĕнтерÿçĕ дипломне тата 3000 тенкĕлĕх сертификата тивĕçрĕ.
Шкул представителĕсене Хусанти танк училищин клубĕнче иртнĕ чаплă мероприятинче — вĕренÿ заведенийĕ 107 çул тултарнине халалланă уяв концертĕнче — наградăларĕç. Мероприятие Мăнçырма шкулĕн вĕрентекенĕсемпе вĕренекенĕсем, Раççей Геройĕн Сергей Ильинăн амăшĕ Елена Федоровна Ильина, ЧР Халăха ĕçпе тивĕçтерекен центрăн Вăрмарти уйрăмĕн начальникĕ — отставкăри подполковник Михаил Анатольевич Пуклаков хутшăнчĕç.
Çакăн пек пысăк конкурсра çĕнтерни Мăнçырма шкулĕшĕн, Вăрмар округĕшĕн тата регионшăн пĕлтерĕшлĕ пулăм. Видеороликшĕн сасăлакансене тата конкурс тăршшĕпех пирĕн шкула пулăшса пыракансене тав тăватпăр. Çак пулăм пин-пин çынна пĕр чăмăра пухса пирĕн Геройсене яланах асра тытнин, чыс тата паттăрлăх хаклăхĕсене ăруран ăрăва куçарса пынин пĕлтерĕшне уçса пачĕ.
Марина РОМАНОВА,
В.Д. Николаев ячĕллĕ Мăнçырмари вăтам шкул директорĕн заместителĕ
