Мартăн 13-мĕшĕнче иртнĕ «Кăтарту пур!» форумра Чăваш Енри сывлăх сыхлавĕн министрĕ Лариса Тарасова Раççей Федерацийĕн Патшалăх Думин депутачĕпе Алла Салаевăпа тата «Единая Россия» партин «Çирĕп çемье», «Сывă пуласлăх», «Хĕрарăмсен юхăмĕ», «Аслă ăру», «Мирлĕ пурнăçа утăм» проекчĕсене пĕрлештерсе тăракан «Сывă çемье» ушкăн членĕсемпе туса ирттернĕ ĕçсене пĕтĕмлетнĕ, çавăн пекех партин çĕнетнĕ Халăх программине кĕртмелли сĕнÿсене хатĕрленĕ. Программăна Чăваш Енре пурăнакансен сĕнĕвĕсенчен хатĕрленĕ, шăпах çак шухăшсем парти ĕçĕнче тĕп вырăн йышăнаççĕ. Халăх программин тĕллевĕ — кашни çынна илтесси тата итлеме пĕлесси, пуласлăха çынсемпе пĕрле йĕркелесси, кашни çынна хăйĕн шухăшне пĕлтерме май туса парасси тата ытти те.
Лариса Тарасова палăртнă тăрăх, сывлăх сыхлавĕн тытăмĕ вăйлă тата меллĕ пулмасан çемьене пулăшасси пулмасть. Шăпах çавăнпа Чăваш Енре «Единая Россия» партин «Сывă пуласлăх» проекчĕ пурнăçланать, республикăра çак проектăн кураторĕ — регионти сывлăх сыхлавĕн министрĕ Лариса Тарасова.
