ЧР Правительствин март уйăхĕн 27-мĕшĕнчи йышăнăвĕпе республикăра апрель уйăхĕн 10-мĕшĕнчен пуçласа пушара хирĕçле режим вăйра. ЧР Министрсен Кабинечĕн март уйăхĕн 30-мĕшĕнчи йышăнăвĕпе килĕшÿллĕн вара апрель уйăхĕн 10-мĕшĕнчен тытăнса Чăваш Енре пушар хăрушсăрлăхĕн уйрăм режимĕ те вăя кĕнĕ. Урăхла каласан, вут-кăвара хирĕç кĕрешмелли ятарлă тапхăрсем иккĕшĕ те апрелĕн 10-мĕшĕнчен пуçланнă.
Мĕн çинчен калаççĕ-ха çак ятарлă режимсем? Вĕсем вăйра пулнă чухне посадкăсен çывăхĕнчи уйсенче, çул айккисенче тата çырмасенче кăвайт хурассинчен тытăнса тăмалла. Çавăн пекех вăрмансенче те кăвайт хума юрамĕ. Канаш лесничествин витĕмĕнче тăракан вăрмансем 50 пин ытла гектар йышăнаççĕ, вĕсем республикăри пилĕк округра вырнаçнă. Эпир, вăрманçăсем, вĕсене сыхласа хăварас енĕпе пур енлĕн ĕçлетпĕр. Çынсемпе профилактика калаçăвĕсем йĕркелетпĕр, рейдсене тухатпăр тата ытти те. Йĕркене пăсакансене тупса палăртсан саккунпа килĕшÿллĕн вĕсене явап тыттаратпăр. Штрафсен суммисем вара — пĕчĕкех мар.
Федераллă саккунăн 141-мĕш статйипе килĕшÿллĕн уйрăм çынсене — 40 пинрен пуçласа 50 пин таранччен, должноçра тăракансене — 60 пинрен пуçласа 90 пин таранччен, юридици сăпатĕнчисене — 600 пинрен пуçласа 1 миллион таранччен штрафлама пултарĕç. Чăваш Енре пушар хăрушсăрлăхĕн уйрăм режимĕ пуçланнă май штрафсен виçи темиçе хутчен те хăпарма пултарать.
Çавăнпа та йывăр лару-тăрăва кĕрсе ÿкес мар тесессĕн тăван тавралăха вут-кăвартан пĕрле туслă йышпа сыхлар, вăрманта пушар хăрушсăрлăхĕн йĕркисене çирĕп пăхăнар. Вут-çулăм алхаснине асăрхасан пурне те çăлав службине 01, 101 тата 112 номерсемпе шăнкăравласа пĕлтерме ыйтатпăр.
Владимир ГЛУХОВ, Канаш тăрăхĕнчи вăрман хуралĕнче ĕçлекен лесничий
