Совет халăхĕ Аслă Отечественнăй вăрçăра çĕнтернĕренпе 81 çул çитнĕ тĕле Вăрмар округĕнчи шкулсем Пĕтĕм Раççейĕпех иртекен «Çĕнтерÿ Ялавĕ умĕнчи часовой» акцие хутшăнаççĕ. В.Д. Николаев ячĕллĕ Мăнçырмари пĕтĕмĕшле пĕлÿ паракан вăтам шкул та акцинчен айккинче юлмарĕ.
Акцие хутшăнса эпир Аслă Отечественнăй вăрçă вăхăтĕнче пирĕн çĕршывăмăрăн ирĕклĕхĕпе никама пăхăнманлăхне сыхласа хăварнă миллионшар ентешĕмĕрĕн паттăр ĕçне хисеплесе чыслатпăр. Çĕнтерÿ Ялавĕ — II степеньлĕ Кутузов орденĕн Идрицăри 150-мĕш стрелковăй дивизин штурм ялавĕ. Ăна 1945 çулхи май уйăхĕнче Берлинра рейхстаг çурчĕ çине хăпартса лартнă. Вăл Аслă Отечественнăй вăрçă вăхăтĕнче Совет Союзĕ нацистла Германие çĕнтернине пĕлтерет.
Мăнçырма шкулĕ Çĕнтерÿ Ялавне апрелĕн 30-мĕшĕнче йышăнма тивĕçрĕ. Ăна Раççей Федерацийĕн хăрушсăрлăх службин аслă лейтенанчĕ ячĕллĕ Кĕтеснерти пĕтĕмĕшле пĕлÿ паракан тĕп шкулти çамрăк армеецсем чаплă лару-тăрура парса хăварчĕç. Çĕнтерÿ Ялавĕ шкулта майăн 5-мĕшĕччен упранчĕ.
Марина РОМАНОВА, шкул директорĕн заместителĕ
