Çуркунне — тавралăха тирпей-илем кĕртмелли тапхăр. Субботниксем экологи лару-тăрăвне лайăхлатма, таврари хутлăха тирпейлеме, çынсем хушшинче экологи культурине йĕркелеме пулăшаççĕ.
Анчах кил-çурт таврашне, урамсене, обществăлла вырăнсене кăна мар, масарсен территорине те тасатса тирпейлесси пысăк пĕлтерĕшлĕ. Масарсене тасалăхра тытасси — кашни çыннăн тÿрĕ тивĕçĕ.
Православи тĕнне ĕненекенсен пысăк уявĕ — Çимĕк — çывхарса пынă май масарсем çинче субботниксем ирттересси уйрăмах актуаллă. Çавна кура Вăрмар округĕнчи ялсенчи масарсем çинче çак кунсенче ĕç кĕрлесе тăрать. Акă, Шăхаль ялĕнче пурăнакан çынсем те иртнĕ канмалли кунсенче ирхине-ирех ял масарĕ çинче пухăнса ырă ĕçе хутшăнчĕç.
Шăхальсем масар çуртне тасатса тухрĕç, ун тавра та тирпейлерĕç, ватăлнă, йăваннă йывăçсене татса вакларĕç, илсе тухрĕç. Чăннипех те пысăк ĕç пурнăçларĕç ял активисчĕсем. Çулсеренех ĕçлеме тухаççĕ, нихăçан та айккинче юлмаççĕ, ыттисене ырă тĕслĕх кăтартаççĕ. Ял ырлăхĕ вĕсемшĕн малти вырăнта. Чунтан тухакан тав сăмахĕсене тивĕç вĕсем.
Марина МАТВЕЕВА,
Шăхальти территори пайĕн начальникĕ
