Чăваш Республикинче «Сывлăх патне утăм» çĕнетнĕ профилактика акцийĕ малалла пырать. Вăл июнĕн 1-мĕшĕнче старт илнĕ. «Единая Россия» партин «Сывă пуласлăх» проекчĕ пулăшнипе Чăваш Республикин Пуçлăхĕн Олег Николаевăн пуçăравĕ çĕнĕ шая хăпарнă. Халĕ акцие икĕ направлени кĕрет — стационарлă «Сывлăх пункчĕсем» тата куçса çÿрекен «Сывлăх пуйăсĕсем».
«Сывлăх патне утăм» проект «Вăрăм та хастар пурнăç» наци проекчĕн тĕллевĕсене пурнăçлассишĕн — республикăри кашни çын хăйĕн сывлăхне вăхăтра тĕрĕслеттерме пултартăр, нумай-нумай çул çирĕп вăй-халпа пурăнтăр тесе — ĕçлет.
«Ача-пăча тухтăрĕ» сывлăх пуйăсĕ» çула июнĕн 1-мĕшĕнче тухнă. Республикăри ертсе пыракан клиникăсен чи лайăх специалисчĕсем Улатăрта пулса кунта пурăнакан ачасен сывлăхне тĕрĕсленĕ.
Июнĕн 10-мĕшĕнче, 09:00 сехетрен пуçласа 17:00 сехетчен, «Ача-пăча тухтăрĕ» сывлăх пуйăсĕ» Вăрмар округĕнче ĕçлĕ. Специалистсем ачасене Вăрмар районĕнчи тĕп больницăра йышăнса консультацисем ирттерĕç.
Наци проекчĕн тĕп задачи — Чăваш Енре пурăнакан кашни çынна профилактика тĕрĕслевĕсемпе чăрмавсăр тивĕçтересси. Сывлăха тĕрĕслеттерсе тăни чир-чĕре вăхăтра, вăл палăрма пуçличченех тупса палăртма тата унран сывалма пулăшать, çавăнпа профилактика малти вырăнта пулмалла. Июнĕн 10-мĕшĕнче «Ача-пăча тухтăрĕ» сывлăх пуйăсĕ» Вăрмар округĕнчи ачасене хапăл туса кĕтет.
Ирина ДАНИЛОВА
