Иртнĕ канмалли кунсенче Шупашкарта хула командисем тата муниципаллă округсен командисем хушшинче пляж волейболĕ /2х2\ енĕпе республикăри II фестиваль иртнĕ. Чи пултаруллă волейболистсен ятне илтессишĕн 2009 çулхи тата çамрăкрах хĕрсем тупăшнă.
Фестивале А.Ф. Федоров ячĕллĕ Вăрмарти спорт шкулĕ çумĕнчи «Урмарочка» команда та хутшăннă. Тренерĕ — Александра Теплова. Муниципаллă округсен командисем хушшинче вăрмарсем лайăх кăтартусемпе палăрнă.
Татьяна Николаева тата Анастасия Павлова 1-мĕш вырăна çĕнсе илнĕ. Кира Ильина тата Диана Васильева 2-мĕш вырăна тухнă. Карина Васильева тата Ульяна Павлова призлă вырăнтан пĕр утăмра чарăнса тăрса 4-мĕш вырăна йышăннă. Унччен маларах «Урмарочка» команда Мари Эл Республикинчи Медведево поселокĕнче иртнĕ турнира та хутшăннă. Ăмăртусем 2015 çулхи тата çамрăкрах волейболистсем хушшинче иртнĕ. Çивĕч тупăшура пирĕн «Урмарочка-2015» команда /сăн ÿкерчĕк çинче/ 1-мĕш вырăна тухнă. Командăри Анна Николаева вара чи лайăх вăйăçăн ятне тивĕçнĕ.
