Республика кунĕнче Пысăк Енккасси ялĕнче паллă мероприяти пулса иртрĕ. Ялти маскировка сеткисем çыхакан пунктра ĕçлекенсене савăнăçлă лару-тăрура хисеплесе чысларĕç.
Ыркăмăллăх ĕçне хутшăнакансем 15-мĕш уйрăм медицина батальонĕн тата Раççейри чăвашсен наципе культура федераллă автономин председателĕн, Раççей Геройĕн Николай Федорович Гавриловăн Тавĕсене тивĕçрĕç. Маскировка сетки çыхакансене пирĕн ентеш — Пысăк Енккасси ялĕнче çуралса ÿснĕ, халĕ «Санкт-Петербургри Чăваш наципе культура автономийĕ», «Ленинград облаçĕнчи Чăваш культура обществи» обществăлла организацисен председателĕ Валериан Анатольевич Гаврилов пулăшнипе тата тăрăшнипе наградăланă.
Мероприятине «Еник» халăх фольклор ушкăнĕ илем кÿчĕ. Пултаруллă артистсем маскировка сетки çыхакансене Республика кунĕ ячĕпе, çавăн пекех ятарлă çар операцине хутшăнакан салтаксене гуманитари пулăшăвĕ кÿнĕшĕн сумлă наградăсене тивĕçнĕ ятпа саламласа чăваш юрри-кĕввине шăрантарчĕç.
Аврора ГРИГОРЬЕВА,
Пысăк Енккассинчи вăтам шкулта математикăпа информатика вĕрентекен
