Пуçарулăх бюджечĕн программипе килĕшÿллĕн Хĕрлĕçыр ялĕнче Ленин урамĕнчен пуçласа ял масарĕ таран пурĕ 505 метр тăршшĕ вак чул сарассипе «Транспортник» тулли мар яваплă общество ĕçленĕ.
Çак ĕçе пурĕ 1781443,27 тенкĕлĕх пурнăçланă. Кунта автотранспорт çаврăнмашкăн ятарласа вырăн йĕркеленĕ тата шыв юхса каймалли 3 пăрăх хывса хăварнă. Асăннă çул-йĕр строительствине пурнăçлама хĕрлĕçырсем тата çак ялта çуралса ÿснĕ, халĕ çĕршывăн тĕрлĕ кĕтесĕнче пурăнакансем укçа-тенкĕ хывса активлă пулăшнă. «Пĕрлĕхре — вăй. Ниме вăл — халăх бюджечĕ. Хамăр таврана хăтлăрах, илемлĕрех тăвассишĕн пурте кар тăрса ĕçлеме, укçи-тенкине ял аталанăвĕшĕн хывма эпир яланах хатĕр», — теççĕ хĕрлĕçырсем. Апла пулсан пĕчĕк ялăн малашлăхĕ пурах тесе калас килет.
Валерий НАРСОВ,
Тикашри территори пайĕн начальникĕ
