Пинер ялĕнчи маскировка сеткисем çыхма хутшăнакан волонтерсем фронта пулăшас ĕçре çĕнĕ рекорд тунă. Çак кунсенче вĕсем 500-мĕш маскировка сеткине çыхнă. Юбилейлă сетка тылпа фронтăн арканми пĕрлĕхне пĕлтерет.
Маскировка сеткисем çыхас ĕçе пинерсем ялти тĕп шкул директорĕ, Вăрмар округĕн депутачĕсен Пухăвĕн депутачĕ Герман Станиславович Боредский тăрăшнипе 2023 çулхи сентябрĕн 15-мĕшĕнче пуçăннă та паянхи кунчченех хастар вăй хураççĕ. Ватăсемпе çамрăксем, вĕрентÿпе культура ĕçченĕсем пирĕн хÿтĕлевçĕсен пурнăçне упраса хăварас ĕç тавра чăмăртаннă. Кашни маскировка сеткине вут-çулăмран хăраман тата салтаксене, техникăпа окопсене тăшман куçĕнчен хупăрлакан ятарлă материалтан çыхаççĕ.
«Пирĕн волонтерсем çыхнă 500 маскировка сетки салтаксене 500 хутчен: «Эсир пĕччен мар», — тесе каланипе танах. Эпир сетка çыхнă май салтаксем вĕсен тылĕ çирĕп пулнине туйса тăраççĕ. Малалла та чарăнса тăмăпăр — тата çĕршер метр маскировка сетки çыхма планлатпăр», — тет Герман Станиславович.
Роза МОРЯКОВА
