Çемье, юрату тата шанчăклăх кунĕнче Чăваш Республикинче регион шайĕнчи «Нумай ачаллă Чăваш Ен» 4-мĕш форум иртнĕ. Унта республикăра пурăнакан нумай ачаллă, телейлĕ, пысăк çемьесем йышлăн хутшăннă. Вĕсен шутĕнче пулма Вăрмар округĕнчи Филипповсен 4 ачаллă çемйи те тивĕçнĕ /сăн ÿкерчĕк çинче/.

Çемьесен уявне Вăрнар поселокĕнчи «Август» культурăпа кану паркĕнче йĕркелесе ирттернĕ. Форум хăйне евĕрлĕ интереслĕ программăпа тĕлĕнтернĕ. Кунта Атăлçи халăхĕсен йăлисем малта пыракан медицина технологийĕсемпе тĕл пулнă. Форумăн тĕп уйрăмлăхĕ — мобильлĕ медицина корпусĕ пулнă. Нумай ачаллă çемьесем Ача-пăча сывлăхĕн центрĕн эксперчĕсем тата ансăр профильлĕ специалистсем /стоматологсем, офтальмологсем\ патне йышăнăва кĕме пултарнă.

Комплекслă тĕрĕслев хыççăн кашни çемье тухтăрсенчен сĕнÿсем илнĕ. Çемьесенчен хăшĕ-пĕр­не сывлăха тĕплĕнрех тĕрĕслеме е черетсĕрех больницăна выртса сипленме направлени те панă. Форум Чăваш Республикин Пуçлăхĕн Олег Николаевăн «Сывлăх патне утăм» проектне малалла тăсакан мероприяти пулса тăнă.

«Çемье пуянлăхĕ, çутă пуласлăх — ачасенче. Ачасем телейлĕ çитĕнччĕр, тулли пурнăçпа пурăнччăр тесе тăрăшатпăр эпир. Форума хутшăнни пире питĕ килĕшрĕ. Ытти муниципалитетсенчи нумай ачаллă çемьесемпе тĕл пулса калаçрăмăр, нумай çĕнĕ япала пĕлтĕмĕр, вăхăта усăллă ирттертĕмĕр», — теççĕ Филипповсем.

Татьяна ГРИГОРЬЕВА,

Вăрмарти халăха социаллă пулăшу кÿрекен комплекслă центрăн директорĕн заместителĕ

Добавить комментарий