Çемье, юрату тата шанчăклăх кунĕнче Вăрнар поселокĕнчи «Август» культурăпа кану паркĕнче республикăри «Нумай ачаллă Чăваш Ен» 4-мĕш форум иртнĕ. Чăваш Республикин Пуçлăхĕ Олег Николаев нумай ачаллă, пур енчен те ырă тĕслĕхлĕ çемьесене уяв ячĕпе ăшшăн саламланă, патшалăх наградисемпе чысланă. Чыслава тивĕçнисен йышĕнче Вăрмар муниципаллă округĕнчи Шăплат ялĕнче пурăнакан Людмила Александровнăпа Василий Николаевич Смирновсен /ÿкерчĕк çинче/ хисеплĕ çемйи те пулнă. Вĕсене Республика Пуçлăхĕ Олег Николаев «Юратупа шанчăклăхшăн» орденпа чысланă. Юратупа, шанчăклăхпа 51 çул пĕрле утаççĕ пурнăç çулĕпе хисеплĕ Людмила Александровнăпа Василий Николаевич Смирновсем. Вĕсем 1975 çулхи октябрĕн 11-мĕшĕнче пĕрлешсе çемье çавăрнă.
Василий Николаевич виçĕ аслă пĕлÿллĕ çын: инженер-механик, экономист-организатор, инженер-электрик. Пур виçĕ специальноçĕпе те яваплă должноçсенче вăй хунă, 5 çул хушши «XXV партсъезд» ячĕллĕ тата «Шибулатовский» совхозсенче директор пулса вăй хунă, «Слава» колхоз председателĕ пулнă. Кая юлса пыракан совхозсене тупăшлă ĕçлеттерсе малтисен ретне кăларнă. Совхозсен вăйĕпе «Вăрмар-Шупашкар» трасса патĕнчен 5 ял патне хытă сийлĕ 12 километр автоçул тунă, Карăкçырми ялĕнче 90 вырăнлăх ача сачĕпе пуçламăш шкул хăпартса лартнă.
1978 çулта Василий Николаевич комбайнпа тырă вырса республикăра чемпион пулса тăнă. Ăна «Ылтăн пучах» тата «Ăмăрту çĕнтерÿçи — 1978» паллăсемпе наградăланă. Вăл ертсе пынă вăхăтра совхозсем тыр-пула пысăк тухăçпа пухса кĕртнĕ — гектартан 39 центнер, çĕрулмине - гектар пуçне 288 центнер, выльăх-чĕрлĕх ĕрчетессипе те кăтартусем пысăк пулнă. 1992 çулта Чăваш Республикин Ял хуçалăх министерстви «Шибулатовский» совхозра выльăх-чĕрлĕх ĕрчетес ĕçпе республика шайĕнчи семинар ирттернĕ. 2021 çулта Василий Николаевич хăйĕн ĕçĕнчи малта пыракан опытпа агропромышленноç ĕçченĕсене паллаштарма икĕ томлă «Вот так сбываются мечты» кĕнеке пичетлесе кăларнă. Унăн мăшăрĕ Людмила Александровна /хĕр чухнехи хушамачĕ — Аркадьева\ Вăрнарти совхоз-техникумран агронома вĕренсе тухнă, «XXV партсъезд» ячĕллĕ тата «Шибулатовский» совхозсенче агроном-пахчаçă пулса вăй хунă. Районта колхоз-совхозсем салансассăн Людмила Александровна Вăрмарти «Паха тĕрĕ» çĕвĕ фабрикинче ĕçленĕ. Унăн Вăрмарти çĕвĕ фабрикин руководствин, сад-пахча ĕçĕнчи çитĕнÿсемшĕн Энтрияль ял тăрăхĕн пуçлăхĕн Хисеп грамотисем те пур.
Смирновсем виçĕ ачана кун çути парнеленĕ. Вĕсен çемйи ялти, округри обществăлла пурнăçа активлă хутшăнать, ĕçченлĕхпе, пĕрлĕхре пулма пĕлнипе, ачасене тĕрĕс воспитани парассипе уйрăлса тăрать.
Эвелина МИХАЙЛОВА хатĕрленĕ
