Çемье, юрату тата шанчăклăх кунĕнче нумай çул пĕрле пурăнакан мăшăрсене те, тин кăна çемье çавăрма хатĕрленекенсене те чыслаççĕ. Вăрмар округĕнче те уяв кунĕнче савăнăçлă мероприятисем иртрĕç.
Акă, ЗАГС пайĕн уявсен залĕнче Арапуç ялĕнче пурăнакан, пурнăç çулĕпе 53 çул алла-аллăн утакан хисеплĕ мăшăра — ялта та, округра та ятлă-сумлă Лидия Исааковнăпа Юрий Аполлонович Ивановсене чаплă лару-тăрура «Юратупа шанчăклăхшăн» медальпе наградăларĕç /сăн ÿкерчĕк çинче/.
Мероприятие Вăрмар муниципаллă округĕн ЗАГС пайĕн начальникĕ Валентина Волкова ертсе пычĕ. Вăл пухăннисене Çемье, юрату тата шанчăклăх кунĕ мĕнле пулса кайни çинчен каласа пачĕ, Лидия Исааковнăпа Юрий Аполлонович Ивановсен çемйипе тата пурнăçĕпе паллаштарчĕ. Ивановсем — пур енчен те ырă тĕслĕхлĕ çемье. Юрий Аполлонович 1975-1987 çулсенче «Путь Ильича» колхозра тĕп инженерта ĕçленĕ, 1987-2010 çулсенче Арапуç ял совечĕн председателĕнче тăрăшнă. Нумай çул тÿрĕ кăмăлпа вăй хунăшăн «Чăваш Республики умĕнчи тава тивĕçлĕ ĕçсемшĕн» орден медальне, ытти наградăсене тивĕçнĕ. Лидия Исааковна пурнăçне медицинăпа çыхăнтарнă, 1975-2006 çулсенче Арапуçĕнчи участокри больницăра акушерка пулса ĕçленĕ. Тăрăшуллă ĕçĕ-хĕлĕшĕн ăна РФ Сывлăх сыхлавĕн министерствин Хисеп грамотипе, тĕрлĕ дипломсемпе, тав çырăвĕсемпе чысланă. Ивановсем икĕ ача — ывăлпа хĕр — ÿстернĕ, ура çине тăма пулăшнă, халĕ ултă мăнукĕпе, пĕр кĕçĕн мăнукĕпе савăнаççĕ.
Лидия Исааковнăпа Юрий Аполлоновича «Юратупа шанчăклăхшăн» медаль илнĕ ятпа Вăрмар муниципаллă округĕн пуçлăхĕн тивĕçĕсене вăхăтлăх пурнăçлаканĕ Олег Кошельков, Арапуçĕнчи территори пайĕн тĕп специалист-эксперчĕ Луиза Васильева, Тихвински Турамăш турăшĕ ячĕллĕ Мăнçырмари чиркÿ настоятелĕ Леонид Ермолаев протоиерей тата Наталия матушка, çывăх çыннисем, юратнă мăнукĕсем ăшшăн саламларĕç. Çемье — кашни çыншăн чи пысăк пуянлăх тата хаклăх пулнине палăртрĕç, ытти мăшăрсене, çитĕнекен ăрăва ырă тĕслĕх кăтартнăшăн тав туса çирĕп сывлăх, вăрăм кун-çул сунчĕç. Вырăнти пултаруллă артистсем вара — Ирина Трифонова, Андрей Игнатьев, Марина Карпова, Марина Николаева — çемье ăшши çинчен юрăсем шăрантарса уява илем кÿчĕç.
Шăхаль ялĕнчи Пашковсен тата Энĕшпуç ялĕнчи Руссковсен çемйисем те çак кун «Юратупа шанчăклăхшăн» медале тивĕçнĕ. Людмила Прокопьевнăпа Юрий Никонович Пашковсем 52 çул пĕрле пурăнаççĕ. Юрий Никонович мĕн çамрăкран спортпа туслă, тĕрлĕ шайри ăмăртусенче ялан малта пулнă, спорт мастерĕн кандидачĕн нормативне пурнăçланă. Шалти ĕçсен министерствин тытăмĕнче ĕçлесе подполковник званийĕнче тивĕçлĕ канăва тухнă. Людмила Прокопьевна нумай çул Шалти ĕçсен министерствин медицина службинче вăй хунă.
Зинаида Ивановнăпа Николай Сергеевич Руссковсем çемье çавăрнăранпа вара 61 çул та иртнĕ. Николай Сергеевич «Авангард» совхозра механикре ĕçлесе тивĕçлĕ канăва тухнă. Зинаида Ивановна ĕмĕр тăршшĕпе Энĕшпуç шкулĕнче пуçламăш классен вĕрентекенĕнче тăрăшнă.
Пашковсем те, Руссковсем те ачисене тĕрĕс воспитани парса çитĕнтернĕ, çĕршыва юрăхлă çынсем тунă. Вĕсен çемйисенче юрату, ăнлану тата килĕшÿ хуçаланаççĕ.
Ирина ДАНИЛОВА
