Вăрмар округĕнче наркотике хирĕç кĕрешекен комиссин черетлĕ ларăвĕ иртрĕ. Ларăва комисси председателĕ — Вăрмар муниципаллă округĕн пуçлăхĕ Василий Шигильдеев ертсе пычĕ.
Комисси членĕсем тата Вăрмар округĕнчи территори пайĕсен начальникĕсем виçĕ ыйтăва пăхса тухрĕç. 2025-2026 вĕренÿ çулĕнче вĕрентÿ учрежденийĕсенче пĕлÿ илекенсемпе социаллă тата психологи тестированийĕ, профилактикăллă медицина тĕрĕслевĕ ирттернин результачĕсем пирки Г.Е. Егоров ячĕллĕ Вăрмарти вăтам шкул директорĕн тивĕçĕсене пурнăçлаканĕ Ольга Матвеева тата Чупайри тĕп шкул директорĕ Людмила Никифорова тухса калаçрĕç. Кăçал кун пек тĕрĕслевсене кашни шкултах ирттернĕ. Шкулсенче наркотике хирĕç кĕрешес ĕçе пурнăçланă май профилактикăна пысăк тимлĕх уйăраççĕ, пĕр ачана та куçран вĕçертмеççĕ, ашшĕ-амăшĕсемпе пĕр тĕллевлĕн ĕçлеççĕ.
Çамрăксене сывă пурнăç йĕркине явăçтарас тĕлĕшпе волонтерсен тата доброволецсен командисен ĕçĕ-хĕлĕ пĕлтерĕшлĕ. Кун пирки Вăрмар муниципаллă округĕн администрацийĕн вĕрентÿпе çамрăксен политикин пайĕн ертсе пыракан специалист-эксперчĕ Сергей Кириллов каласа пачĕ. Волонтерсем сывă пурнăç йĕркипе çыхăннă тĕрлĕ мероприятисене, обществăлла усăллă ĕçсене хутшăнаççĕ, хăйсен ырă тĕслĕхĕпе çамрăксене сывă пурнăç çулĕ çине тăма хавхалантараççĕ, сиенлĕ йăласенчен пăрăнма хĕтĕртеççĕ.
Вăрмарти тĕп больницăн тĕп врачĕн тивĕçĕсене пурнăçлаканĕ Александра Филиппова наркотиксемпе тата психотроплă япаласемпе усă куракан çынсен комплекслă реабилитацийĕ тата ресоциализацийĕ мĕнле пурнăçланни çинчен сăмах хускатрĕ. Вăрмар больницинче ку ыйту ялан тимлĕхре. Паянхи кун тĕлне наркотиксемпе иртĕхекен çынсем учетра çук, анчах темиçе çынна Вăрмар сучĕн йышăнăвĕпе тимлесех тăраççĕ.
Комисси ларăвне хутшăнакансем округра наркотике хирĕç кĕрешес ĕçе малалла тăсма, профилактика енĕпе ытларах ĕçлеме калаçса татăлчĕç.
Ирина ДАНИЛОВА
