Унта 11 регионтан килнĕ 57 предприяти хутшăннă.
Выставкăра Раççейре, Китайра, Беларуç Республикинче тата ытти çĕршывра туса кăларнă агротехникăпа, выльăх-чĕрлĕхе çитермелли хутăшсемпе, чир-чĕрпе тата хурт-кăпшанкăпа кĕрешмелли препаратсемпе, тырă сорчĕсемпе паллаштарнă.
Чăваш Ен Министрсен Кабинечĕн Председателĕн заместителĕ Андрей Макушев курав ял хуçалăхĕн аталанăвĕшĕн, çĕр çинче ĕçлекенсемшĕн питĕ пĕлтерĕшлĕ пулнине, наукăпа технологири çĕнĕлĕхсем агропромышленноç комплексне тĕревленине палăртнă. «Уй кунĕ» курав вăхăтĕнче «Агро-100» клуба кĕрекен предприятисен рейтингне пĕтĕмлетнĕ. 2025 çулхи ĕç-хĕл кăтартăвĕсемпе чи лайăх 10 организацие чысланă. Унпа килĕшÿллĕн пĕрремĕш картлашка çине «Çĕрпÿ беконĕ» пĕрлешÿ хăпарнă. Юрий Федотов директор каланă тăрăх, ку – ĕç коллективĕн пĕрлехи çитĕнĕвĕ. «Пирĕн ĕçе пысăк хак пани малалла та тăрăшса ĕçлеме хавхалантарать», – тенĕ Юрий Александрович. Сăмах май, 2024 çулхи ĕç пĕтĕмлетĕвĕпе те предприяти пĕрремĕш вырăн йышăннă.
