Чăваш Республикин Пуçлăхĕн «Сывлăх патне — утăм» проекчĕ иртнĕ кунсенче Кавал ялĕнче ĕçлерĕ. Вăл пулăшнипе пĕр кунта 136 çын хăйĕн сывлăхне тĕрĕслеме пултарчĕ. Пур тĕрĕслев те — пĕр вырăнта.
Ял çыннисен округ центрне кайма, ĕçрен ыйтма е черетре ларма тивмерĕ. Тухтăрсем комплекслă тĕрĕслевсем ирттернĕ, тĕрĕс апатлану енĕпе, профилактика тĕлĕшĕнчен сĕнÿсем панă, хăшĕ-пĕрисене вара малалла сипленме направлени çырса панă. «Пысăк тав тухтăрсене! Нумай çул пурăнатăп пулин те хам çинчен чылай çĕнни пĕлтĕм», - пĕлтерчĕ хăйĕн шухăшне ял çынни.
Çакăн пек пулăшу пенсионерсемшĕн уйрăмах паха — квалификациллĕ медицина халăх патне яла хăй килет.
Надежда ШИШКИНА
