Паян Вăрмар районĕнче Пĕрлехи информации кунĕ иртрĕ. Информушкăн членĕсем — Вăрмар район пуçлăхĕ М.Пуклаков, райадминистраци пуçлăхĕ А.Васильев, райадминистрацин пай пуçлăхĕсем, ЧР строительствăпа архитектура тата пурăнмалли çурт-йĕрпе коммуналлă хуçалăх министрĕн пĕрремĕш заместителĕ В.Максимов, ЧР Сывлăх сыхлавĕн министерствин «Фармация» патшалăх унитари предприятин генеральнăй директорĕ О.Казарина, ЧР çутçанталăк ресурсĕсен тата экологи министрĕн ĕçĕсене вăхăтлăх пурнăçлаканĕ Н.Косулин, Федераллă службăн патшалăх статистикин Чăваш Республикинчи территорири органĕн пуçлăхĕн заместителĕ Л.Егорова — районти ял тăрăхĕсенче ĕçлерĕç. Кун йĕркинчи тĕп ыйтусене — ЧР Пуçлăхĕн М.Игнатьевăн 2019 çулхи сентябрĕн 26-мĕшĕнчи 118 номерлĕ «Чăваш Республикинче пурăнакансен пурнăç пахалăхне лайăхлатмалли хушма мерăсем çинчен» Указĕ; 2019 çулта Чăваш Республикинче «Хăрушлăхсăр тата пахалăхлă çулсем» наци проектне пурнăçласси; Чăваш Республикинче 2020 çулхи пĕрремĕш çурçуллăха хаçат-журнал çырăнтарассипе иртекен çырăнтару кампанийĕ — халăхпа пăхса тухрĕç.
Октябрĕн 16-мĕшĕнче чăваш халăх писателĕ В.Алентей çуралнăранпа 100 çул çитнĕ ятпа Кĕтеснерте савăнăçлă уяв иртрĕ. Информушкăн членĕсен ĕç кунĕ унта хутшăннинчен пуçланчĕ. Вĕсем çыравçăн вил тăприйĕ çине чĕрĕ чечексем хучĕç, В.Алентей ячĕпе хисепленекен парка çитсе курчĕç. Унтан районти ял тăрăхĕсене çул тытрĕç. Райадминистраци пуçлăхĕн пĕрремĕш заместителĕ Н.Павлов тата Федераллă службăн патшалăх статистикин Чăваш Республикинчи территорири органĕн пуçлăхĕн заместителĕ Л.Егорова Шăхаль ял тăрăхĕн администрацийĕн ĕçченĕсемпе тата кунти шкул коллективĕпе калаçу ирттерчĕç. Тĕп темăсене сÿтсе яврĕç, çынсен ыйтăвĕсем çине те хуравларĕç.
И.Данилова.
