Ирина Васильевна ИВАНОВА, Пысăк Енккассинчи пĕтĕмĕшле пĕлÿ паракан вăтам шкулта чăваш чĕлхипе литературине вĕрентекенĕ: «РФ Конституцине кĕртме сĕнекен улшăнусем пирĕнтен кашниех пырса тивеççĕ. Вĕсем хушшинче патшалăх чĕлхине аталантарассипе çыхăннисем. Раççей территорийĕнчи республикăсен хăйсен патшалăх чĕлхине çирĕплетме ирĕк пур. Патшалăх влаç , вырăнти хăйтытăмлăх органĕсенче, патшалăх учрежденийĕсенче тăван чĕлхепе вырăс чĕлхипе танах усă курмаллине каланă. Раççей Федерацийĕ халăхсене хăйсен тăван чĕлхине упраса хăварма, ăна вĕренме тата аталантарма условисем туса хурассине гарантилет. Çакă пирĕн тăван чăваш чĕлхине те тÿрремĕнех пырса тивет. Чăваш Ен Пуçлăхĕн ĕçĕсене вăхăтлăх пурнăçласа пыракан О.Николаев тăван чĕлхене вĕрентни наци пуянлăхĕпе йăла-йĕркесене упраса хăварма пулăшать тесе шутлать. Чăваш Енре чăваш чĕлхине упраса хăварасси çине уйрăмах тимлĕх уйăрассине палăртнă вăл. «Чĕлхене упраса хăварма тата аталантарма тĕллевлĕ мероприятисем ирттерни питĕ пĕлтерĕшлĕ. Йăлана кĕнĕ хаклавсене, культурăна, йăла-йĕркене упраса хăвармалла», - палăртнă хăйĕн шухăшне О.Николаев. Чăваш чĕлхи кунне халалласа ЧР Вĕренÿ институчĕ апрель уйăхĕн 20-25-мĕшĕсенче «Эпĕ чăвашла калаçатăп» акци ирттерет. Акцие чăвашла калаçакан кирек кам та хутшăнма пултарать: чăваш чĕлхи çинчен сăвă вуласа видео çине çырса илмелле те #эпĕчăвашлакалаçатăп хештегпа Интернетри социаллă сетьсене вырнаçтармалла. Эпĕ те çак акцие хутшăнма кăмăл тăватăп».

Добавить комментарий