Чир ересрен сыхланасси кайран унран сывлассинчен пĕлтерĕшлĕрех теççĕ. Çак сăмахсем çĕршывра хăрушă коронавирус инфекцийĕ алхаснă вăхăтра уйрăмах актуаллă.
COVID-2019 сарăласран йышăннă мерăсенчен пĕри вăл — çынсем харпăр хăйсене хÿтĕлемелли хатĕрсемпе /маскăсемпе, перчеткесемпе, алла дезинфекцилемелли шĕвексемпе\ усă курни. Халăх нумай çÿрекен вырăнсенче маскăсем тăхăнмаллине пурте пĕлетпĕр, апла пулин те юлашки вăхăтра суту-илÿ вырăнĕсенче, ытти çĕрте те маскăсемсĕр çÿрекенсем час-часах тĕл пулаççĕ. Анчах та маскăсене хывма иртерех пулнине палăртмалла.
Республика территорийĕнче коронавирус инфекцийĕ сарăлассипе кĕрешес тĕллевпе йĕркеленĕ Оперативлă штабăн иртнĕ ларăвĕнче çак уйăхăн малтанхи кунĕсенче коронавируспа аптăракансен йышĕ пĕр вăхăт ÿснĕ тапхăр пулнине каланă. Роспотребнадзорăн Чăваш Енри Управленийĕн руководителĕ Н.Луговская палăртнă тăрăх, ку вăл шăпах та çынсем маскăсем тăхăнмалли режима пăхăнманнипе, çавăн пекех пĕр-пĕрин хушшинче дистанци тытманнипе çыхăннă.
Маскăсем тăхăнмалли режим республикăра, çав шутра Вăрмар районĕнче те, халĕ те вăйра пулнине никамăн та манмалла мар. Хăрушсăрлăх мерисене унчченхи пекех пăхăнмалла. Çакна тимлесе тăрас тĕлĕшпе районта ятарлă мобильлĕ бригадăсем ĕçлеççĕ, вĕсем суту-илÿ объекчĕсене, организацисемпе предприятисене, обществăлла вырăнсене тухса çÿресе тĕрĕслев ĕçĕсем, калаçусем ирттереççĕ.
Ю.ЕФИМОВ, райадминистрацин гражданла оборона ĕçĕсен тата чрезвычайлă лару-тăру секторĕн заведующийĕ.
