Э.Михайлова, редактор: Çĕршыв Президенчĕн В.Путинăн кăçалхи пресс-конференцийĕ «тÿрĕ лини» элеменчĕсемпе иртрĕ. Çулталăк вĕçленсе пынă май 2020 çулталăка пĕтĕмлетме хистет. Лайăх-и вăл, япăх-и — тÿрех татса хаклама та çук. Владимир Путин ăна çанталăкпа танлаштарчĕ. Пурнăçри пекех çанталăк та тĕрлĕрен пулать. Пандеми йывăрлăхĕ пирĕн пурнăçри кашни сферăнах пырса тиврĕ, шел пулин те лайăх енчен мар. Пуçламăшĕнчех пирĕн çĕршыв ăна кĕтсе илме хатĕр мар пулчĕ темелле, ку мĕнле чир пулнине, ăна мĕнле тупса палăртма май пуррине, вакцина пулассипе пулмассине те пĕлмен. Анчах та темĕнле пулсан та Раççей ытти çĕршывсемпе танлаштарсан ку эпидемие тивĕçлĕн кĕтсе илчĕ, пур енĕпе те малти позицисене йышăнма пултарчĕ. Коронавируса хирĕç тухăçлă вакцина туса кăларса унăн производствине пуçарса ярассипе Раççей тĕнчери чи пĕрремĕш пулчĕ. 95-97 процент таранчченех эффективлă вакцина Раççейре кăна мар, тĕнче шайĕнчи лару-тăрăва лайăхлатасса шанатпăр.
2020 çулăн ырă енĕсене палăртас пулсан, Аслă Çĕнтерÿ 75 çул тултарнипе çыхăннă пысăк калăпăшлă мероприятисем пĕлтерĕшлĕ. Çĕршывра вĕсене тивĕçлĕн ирттерсе янă, тĕп вырăнта вара — нимĕнле йывăрăлха пăхмасăрах халăх пĕрле пулни. Çак енĕпе медиксемпе волонтерсен ĕçне пысăк хак пачĕ В.Путин.
И.Данилова, редактор: «Декабрĕн 17-мĕшĕнче Раççей Президенчĕ Владимир Путин пысăк пресс-конференци ирттерсе массăллă информаци хатĕрĕсен представителĕсен тата ахаль граждансен ыйтăвĕсем çине хуравларĕ. Конференцине хутшăнакансемпе вăл видеоçыхăну мелĕпе калаçрĕ. Владимир Владимирович темиçе сехет хушши паянхи куншăн чи актуаллă, чи пĕлтерĕшлĕ ыйтусем çине хуравларĕ. Яланхи пекех темăсем тĕрлĕрен пулчĕç: экономика, тулаш тата шалти политика, сывлăх сыхлавĕ, вĕрентÿ, çÿп-çап реформи тата ытти те. Хальхи вăхăтра, çĕршывра коронавирус инфекцийĕ сарăлнăран, шкул ачисене, студентсене онлайн мелпе вĕрентес ыйту çивĕч тăрать. Конференцинче, паллах, çакăн пирки те сăмах хускатрĕç. Владимир Владимирович палăртнă тăрăх, пирĕн çĕршывра 39,9 пин шкул, вĕсенчен 2 проценчĕ онлайн ĕçлет. Аслă шкулсене вара пурне те онлайн ĕçлеме сĕннĕ. Онлайн мел çине куçас пулсан интернетпа йывăрлăхсем сиксе тухмалла мар. 2021 çулта çĕршыври пĕтĕм шкулта пысăк хăвăртлăхлă интернет пулмалла. Аслă шкулсем пирки калас пулсан, вĕсене кăçал онлайн ĕçлесе пыма икĕ хутчен те укçа-тенкĕ енчен пулăшу панă. Паллах, онлайн вĕрентни вĕрентекенпе ачасем куçа-куçăн ĕçленине çитес çук. Çапах та онлайн вĕрентесси шкулсенче аталансах пырĕ. Çапла пĕлтерчĕ Президент. Мĕнех, вăхăт пĕр вырăнта тăмасть. Халĕ, пысăк технологисен саманинче, пирĕн те тĕрлĕ çĕнĕлĕхсене йышăнма хăнăхмалла. Вĕсем пирĕн ачасемшĕн усăллă пуласса шанатпăр».
