З.ПАВЛОВА, «Хĕрлĕ ялав» хаçатăн тĕп редакторĕ:
«Декабрĕн 24-мĕшĕнче 11 сехетре ЧР Пуçлăхĕн Олег Алексеевич Николаевăн пресс-конференцийĕ иртрĕ. Ку хутĕнче вăл онлайн мелпе пулчĕ. Республикăри пур массăллă информаци хатĕрĕсен ĕçченĕсем те хутшăнчĕç пресс-конференцие. Чăваш Республикин аталанăвĕпе, çул-йĕр, строительство, туризм, кунта пурăнакансен пурнăç условийĕсемпе çыхăннă чылай ыйтусене хускатрĕç кунта.
Олег Николаев хăйĕн командине еплерех йĕркелени, хуласемпе районсен администрацийĕсен çĕнĕ пуçлăхĕсенчен тÿрремĕнех мĕн кĕтни çинчен каласа пачĕ. Ку е вăл ыйтăва хăй патне туллин çитерме пĕлмеллине, унсăрăн чăнлăха тĕппипех ăнланса пĕтереймĕн, йывăрлăха татса параймăн терĕ Олег Николаев. Çавăн пекех ЧР Пуçлăхĕ «вăрçă ачисене» коммуналлă пулăшусемшĕн тÿленĕ чухне финанс тĕлĕшĕнчен çăмăллăхсем кÿрес ыйтăва тишкернине пĕлтерчĕ. «Пулăшу мерисене пурнăçламалли укçа-тенкĕне çитес çулах уйăрма хатĕр эпир. ЧР Министрсен Кабинечĕ умне задача лартăп, Чăваш Патшалăх канашне яракан Çырура та палăртăп çак ыйтăва», - терĕ Олег Алексеевич.
Онлайн мелпе иртнĕ пресс-конференцие Куславкка, Тăвай районĕсенче тухса тăракан хаçатсен тĕп редаторĕсем те хутшăнчĕç. Тÿрĕ эфира пурте пĕрле Вăрмар районĕнчи «Хĕрлĕ ялав» хаçат редакцийĕнчен тухрăмăр. Куславкка районĕн «Ялав» хаçатăн тĕп редакторĕ В.Константинов Олег Алексеевича шалти туризма аталантарассипе çыхăннă ыйтăва пачĕ».
