Паян Чупай ялĕнче йĕлтĕрпе чупса мала тухассишĕн район шайĕнчи ăмăрту тата чемпионат иртрĕ. Унта хамăр район çыннисем те, Тăвай, Куславкка районĕнчи спортсменсем те активлă хутшăнчĕç.
Спорт уявĕн торжествăлла пайĕ ялти культура çуртĕнче пулчĕ. Пухăннисем умĕнче саламлă сăмахпа Вăрмар район администрацийĕн физкультурăпа спорт пайĕн начальникĕ А.Краснов, райадминистрацин вĕрентÿпе çамрăксен политикин управленийĕн начальникĕ Н.Иванова, А.Ф.Федоров ячĕллĕ ачасемпе çамрăксен Вăрмарти спорт шкулĕн директорĕ — ăмăртăвăн тĕп судйи — С.Архипов, Чупайĕнчи пĕтĕмĕшле пĕлÿ паракан тĕп шкулти физкультура вĕрентекенĕ — ăмăртăвăн тĕп секретарĕ — А.Ноздрин, Чупай ял тăрăхĕн пуçлăхĕ Н.Иванов тухса калаçрĕç. Спортсменсене старта хавхалануллăн пуçласа финишалла ăнăçлă çитме çĕкленÿллĕ кăмăл-туйăм сунчĕç, ăмăрту результачĕсене ГТО нормативĕсене пурнăçланă пек шута илессине пĕлтерчĕç.
Унтан пурте пĕрле ăмăрту вырăнне — чиркÿ çумĕнчи территорине, уялла, çул тытрĕç. Çапла кĕтнĕ вăхăт та çитрĕ. Ăмăртакансен пĕрремĕш ушкăнĕ — чи кĕçĕннисем — хăйсен дистанцине парăнтарса чупса тухрĕç. Вĕсем хыççăн ыттисем те ăмăртрĕç — çул ÿсĕмне кура ушкăнăн-ушкăнăн черетпе. Финишра кĕтсе тăракан судьясем кам хăш вăхăтра чупса çитнине паллă туса пычĕç. Тин кăна чупса тухнă спортсменсене ăшăнма вĕри чейĕ те кунтах.
Йĕлтĕрçĕсенчен кам миçемĕш вырăна тивĕçнине палăртнă хыççăн вĕсене черетпе наградăлама пуçларĕç. Çĕнтерÿçĕсемпе призерсене медальсемпе тата грамотăсемпе чысларĕç, асăнмалăх парнесем пачĕç.
{gallery}albums/2021/12.03.2021{/gallery}
Ирина Данилова.
