Июлĕн 16-мĕшĕнче Чăваш Енре вакцинаци ыйтăвĕпе тÿрĕ лини иртрĕ. Ăна Чăваш Наци телерадиокомпаницĕн тÿрĕ эфирĕнче, социаллă сетьсем урлă курма, итлеме май пулчĕ. Ыйтусем çине ЧР Министрсен Кабинечĕн председателĕ, вĕренÿ министрĕ Алла Салаева, сывлăх сыхлавĕн министрĕ Владимир Степанов, Шупашкар хулин тĕп больницин тĕп тухтăрĕ Татьяна Маркелова хуравларĕç. Ку хутĕнче те вĕсем халăха коронавирусран прививка тумалла тесе чĕнсе каларĕç.
«Çынсене чиртен хÿтĕлес тесен республикăра пурăнакансен 60 проценчĕн иммун тытăмне çирĕплетмелле. Хальхи вăхăтра инфекци анлăн сарăлас хăрушлăх пур. Чир вăй илсен пĕлтĕрхи пек асăрханулăх мерисем йышăнма тивĕ. Вакцинаци пĕлтĕрхи йывăр тапхăра таврăнассинчен хăтарĕ», — терĕ вице-премьер. Тĕрлĕрен ыйту паракансем чылай пулчĕç. Тÿрĕ эфира шăнкăравласа лекекенсем хушшинче пĕрне прививка тăвас умĕн тата ун хыççăн хăçанччен эрех-сăра ĕçме юраманни кăсăклантарчĕ, тепри вара коронавируспа виçĕ хутчен чирленĕ, апла пулин те юнра антителасем çукки пăшăрхантарать, виççĕмĕшĕ вара прививкăна çылампа тутарнинчен мĕнле хăтăлма май пур тесе ыйтрĕ, вакцинацин пĕрремĕш тапхăрĕ хыççăн тепĕр виçĕ-тăватă кунран коронавируспа чирлесе кайсан мĕн тумалли пирки кăсăкланчĕ тăваттăмĕшĕ. «Прививка тăвас умĕн виçĕ кун маларах тата ăна тунă хыççăн 3 е ытларах кун иртмесĕр, организм вăй илсе каймасăр, эрех-сăра таврашне ĕçме юрамасть», - терĕ сывлăх сыхлавĕн министрĕ В.Степанов. Коронавируспа темиçе хутчен те чирленĕ хĕрарăмăн юнра антителасем палăртман тĕслĕхе контроле илсе тĕплĕнрех тĕрĕслеме шантарчĕ вăл. Вакцинацин пĕрремĕш тапхăрĕ витĕр тухнă хыççăн тепĕр виçĕ-тăватă кунтан коронавируспа чирлесе кайнă граждансене малтан чиртен сыватаççĕ, унтан тин иккĕмĕш тапхăрне хутшăнма ирĕк параççĕ.
Акă пĕри организма вакцинăна епле йышăнни çинчен ыйтрĕ. «Кашни çыннăн тĕрлĕ рекаци пулать. Ÿт температури ÿсме, пуç ыратма, вăй пĕтме пултарать. Ÿт температури ÿссен эмел ĕçессинчен тăхтаса тăмалла, ун вырăнне шыв нумайрах ĕçмелле. Виçĕ кун йывăр ĕç тумалла мар», — ăнлантарчĕ Татьяна Маркелова. Тата ытти ыйтусем те пулчĕç. Сентябрь уйăхĕ тĕлне вĕрентекенсене прививка туса пĕтерме сĕнчĕ Алла Салаева, çавăн пекех шкул ачисене вакцинацилемеççĕ тесе пĕлтерчĕ. Пысăк хырăмлă тата кăкăр ĕмĕртекен хĕрарăмсен прививка тумалла мар терĕ Шупашкар хулин тĕп больницин тĕп тухтăрĕ Т. Маркелова
Э.МИХАЙЛОВА.
