Надежда Николаевна ШАНИНА, Вăрмарти тĕп суйлав комиссийĕн председателĕ.
— Эпĕ çак должноçре чылайранпах ĕнтĕ. Апла пулин те ку ĕçпе çыхăнман малтанхи çулсенче те пĕр суйлавран та юлса курман. Хамăра астăвасса суйлав пирĕншĕн те, атте-аннесемшĕн те яланах уяв вырăнĕнчех пулнă темелле. Суйлав йĕркисем çирĕпленсе, улшăнса пычĕç пулин те хуть те хăш вăхăтра та вĕсем тĕрĕс те ултавсăр иртнĕ, иртеççĕ те. Паллах, кашниех хăйне килĕшекен кандидатшăн та, партишĕн те суйлама пултарать. Пĕр гражданинăн сасси те çухалмасть, айккине пытанса юлмасть. Суйлавччен иртекен агитаци тапхăрĕ пире тĕплĕ, тĕрĕс йышăну тума май парĕ. Районти «Хĕрлĕ ялав» хаçат та Вăрмарти тĕп суйлав комиссийĕпе тачă çыхăнса ĕçлет. Суйлав тĕрĕс те пăтăрмахсемсĕр иртессишĕн эпир тăрăшсах ĕçлетпĕр. Кăçал Вăрмар район территорийĕнчи суйлав комиссийĕсене пурне те тенĕ пекех видеосăнав камерисемпе тивĕçтереççĕ. Кашни суйлав кампанийĕ хăйне майлă иртет. Кандидатсене регистрацилес ĕç тимлĕ те яваплă пулма ыйтать. Вĕсем те хăйсен кандидатурисене тăратнă чухне те халăха шанаççĕ, тĕрĕс йышăну тăвасса кĕтеççĕ.
