Паян, августăн 18-мĕшĕнче, Вăрмар районĕнче ĕçлĕ визитпа Чăваш Республикин Пуçлăхĕ О.Николаев пулчĕ. Район ертÿлĕхĕ ăна Вăрмарти «Зоренька» ача садĕнче кĕтсе илчĕ. Ача сачĕн заведующийĕ Марина Васильевна Петрова кунта кăçал туса ирттернĕ калăпăшлă юсав ĕçĕсемпе паллаштарчĕ. Олег Алексеевич икĕ хутлă ача сачĕпе, кунта ĕçлекенсемпе тĕл пулса калаçрĕ. Вăл ачасене чăваш чĕлхине вĕрентесси çине уйрăмах тимлĕх уйăрмаллине палăртрĕ.
Малалла ЧР Пуçлăхĕ О.Николаев Вăрмарти тасатакан сооруженисен ĕçĕпе паллашрĕ. Ку объектшăн «Урмарытеплосеть» МУП яваплă, çавна май унăн директорĕ Н.Зайцев тасатакан сооруженисен ĕçĕ еплерех йĕркеленни çинчен каласа пачĕ. Реконструкци туса укçа тăкакличчен çĕнни туса лартсан лайăхрах терĕ ЧР Пуçлăхĕ О.Николаев ку объект пирки, ку енĕпе кирлĕ хутсем хатĕрлеме хушрĕ.
Малалла ĕçлĕ çул-çÿревпе Олег Алексеевич «Иванов В.А» хресчен-фермер хуçалăхĕн тулă уйĕнче пулса курчĕ. Кунта харăсах 3 комбайнпа тырă выраççĕ. Кăçал патшалăх пулăшнипе Владимир Анатольевич çĕнĕ комбайн туяннă. Республика Пуçлăхĕ О.Николаев çĕнĕ комбайн штурвалĕ умне ларса тырă пусси тăрăх пĕр çаврăм турĕ. Пысăк хак пачĕ вăл çĕнĕ техникăна. Хуçалăх пуçлăхĕ В.Иванов та патшалăх енчен пулăшу кÿнĕшĕн, ĕçлеме хавхалантарса пынăшăн тав турĕ.
Тĕплĕнрех «Хĕрлĕ ялав» хаçатăн çитес номерĕнче
Э.МИХАЙЛОВА
