Чăваш Ен Пуçлăхĕ О.Николаев çак кунсенче «АиФ» хаçат редакцийĕнче журналистсен ыйтăвĕсем çине хуравласа пысăк интервью панă. Журналистсем Олег Николаевăн социаллă сетьсенчи наци чĕлхине аталантарассипе тытса пыракан блок пĕлтерĕшĕ тата тĕллевĕ пирки ыйтнă. ЧР Пуçлăхĕ интервьюра çапла пĕлтернĕ: «Ку вăл маншăн халăха чăваш чĕлхипе интереслентересси. Чăваш чĕлхи, паллах, тимлĕх ыйтать. Эпĕ час-часах ытларах чăвашсем пурăнакан ялсенче пулатăп. Пĕринче ача сачĕ уçатпăр, пĕчĕк ачасем пур. Эпĕ ачасемпе чăвашла калаçатăп, воспитательсем вара вĕсене вырăсла калаçма хушаççĕ. Ку, паллах, япала мар. Чиновнискене ăнлантарнă, анчах та кунта чи кирли - çынсене интереслентересси. Çапла манăн пысăках мар блок шăпах çакăн валли. Пирĕн чи малтанах чăваш чĕлхин грамматикине вĕренесси çине мар, чĕлхене пĕлесси тата унпа усă курасси çине пусăм тумалла. Тăван чĕлхе аталантăр тесен çынсен унпа калаçмалла. Çапла пирĕн халăха унпа калаçма хавхалантармалла. Унсăрăн чĕлхе пĕтет. Чĕлхесене аталантармалли ятарлă фонд хатĕрленĕ. Чăваш чĕлхине вĕренес текенсен йышĕ майĕпен ÿссех пынине сăнатпăр юлашки вăхăтра».
Тĕслĕхрен, акă, ЧР Пуçлăхĕ Вăрмар районĕнче ĕçлĕ çул-çÿревпе пулнă май актуаллă ыйтусене сÿтсе явнă чухне те йăлтах чăвашла калаçнă. «Зоренька» ача садĕнче пулнă май воспитательсене ачасемпе чăвашла калаçмаллине асăрхаттарнă. Вăрмар районĕнчи шкулсенче те чăваш чĕлхине аталантарассипе тăрăшса ĕçлеççĕ. ЧР Пуçлăхĕн 2021 çулхи июлĕн 29-мĕшĕнчи 346-РГ номерлĕ Хушăвĕпе килĕшÿллĕн ЧР Пуçлăхĕн çулсеренех чăваш чĕлхипе тата литературипе, тутар чĕлхипе тат литературипе, мордва чĕлхи тата литературипе регион, халăхсем хушшинчи шайра олимпиада çĕнтерÿçисемпе призерĕсене хатĕрлекен педагогика ĕçченĕсене укçа парса хавхалантараççĕ. Г.Е.Егоров ячĕллĕ Вăрмарти пĕтĕмĕшле пĕлÿ паракан вăтам шкулта чăваш чĕлхипе литературине вĕрентекен Валентина Германовна Антонова халăхсем хушшинчи олимпиада çĕнтерÿçине хатĕрленĕшĕн 50 пин тенкĕне тивĕçнĕ.
