Паянхи кун çĕнĕ йышши технологисем пысăк хăвăртлăхпа аталанса пыраççĕ, кĕске вăхăтрах çĕнĕлĕхсем яла та çитеççĕ. Нумай пулмасть кăна Вăрмар районĕнчи Анаткас ялĕнче пурăнакансем ялта мобильлĕ çыхăну япăххипе, Интернет çуккипе тертленетчĕç. Анаткас ялĕ айлăмлăрах вырăнта вырнаçнă, çавăнпа та кунта çыхăнупа йывăрлăхсем пулнă. Халĕ вара пĕр уйăх ĕнтĕ ял халăхĕ Интернет ырлăхĕпе, мобильлĕ çыхăнупа пĕр чăрмавсăр усă курать. Шăпах октябрь уйăхĕн вĕçĕнче кăçал «Ростелеком» компани ялта ТЕЛЕ2 операторăн вышкине лартнă. ЧР Цифра аталанăвĕн министерствипе «Ростелеком» компани 100 ытла çын пурăнакан ялсенче цифра танмарлăхне пĕтермешкĕн пысăк хăвăртлăхлă Интернет çыхăнăвĕпе усă курма май паракан базăллă станцисем вырнаçтарассипе ĕçлекен ятарлă программăна пурнăçлассипе тăрăшаççĕ. Анаткасри вышкăна та шăпах çак программа шайĕнче вырнаçтарнă.
Малтанах вышка лартас ыйтупа ĕç-пуç ансатах пулман, ял халăхĕ çĕнĕлĕхрен шикленнине палăртнă, ăна ял варринче вырнаçтарассине хирĕçлеме тăнă. Çĕнĕ объект сиенлĕ хумсем сарассинчен шикленнĕ çынсем. Анаткассем Интернет кирлине лайăх ăнланнă, анчах та малтанах çак вышкăна уйра вырнаçтарма май çук-ши тенĕ. Анчах та çĕнĕ объекта уя лартнă пулсассăн унăн вăйĕ чакĕччĕ. ЧР Патшалăх Канашĕн депутачĕ Ю.Зорин, унăн Вăрмар районĕнчи пулăшуçи Ю.Иванов, Чулкас ял тăрăхĕн пуçлăхĕ Г.Усков ял халăхĕпе август уйăхĕнче пуху ирттерсе вышка сиенсĕр пулнине ăнлантарнă, ăна ялта вырнаçтарассипе халăхпа пĕр чĕлхе тупма пултарнă.
ТЕЛЕ2 операторăн вышкине вырнаçтарнă хыççăнах сотовăй çыхăну операторĕ ял çыннисене тÿлевсĕр сим-картăсем парнеленĕ. «Ялĕпех ТЕЛЕ2 çине куçса пĕтрĕмĕр, çутта тухрăмăр», - теççĕ халĕ Анаткассем.
Вĕсен савăнăçне пĕрле пайлама çак кунсенче яла ЧР Цифра аталанăвĕпе информаци политикин тата массăллă коммуникацисен министрĕ К.Майнина, ЧР Патшалăх Канашĕн депутачĕ Ю.Зорин, «Ростелеком» компанин Чăваш Енри филиалĕн директорĕ Е.Макагонов килсе çитрĕç /ÿкерчĕк çинче/. Ял çыннисен шухăш-кăмăлĕпе паллашрĕç вĕсем.
«Вышка лартиччен япăхчĕ, çыхăну çукчĕ, халĕ вара хулари пекех пурăнатпăр. Тавтапуçах «Ростелеком» компание, ЧР Цифра аталанăвĕн министрне К.Майнинăна, ЧР Патшалăх Канашĕн депутатне Ю.Зорина, Чулкас ял тăрăхĕн пуçлăхне Г.Ускова пирĕншĕн çакăн пек парне туса панăшăн. Халĕ эпир çыхăнушăн, Интернетшăн самай сахалрах тÿлетпĕр, килтен тухмасăрах тĕрлĕ тÿлевсене тÿлетпĕр, Пĕрлехи патшалăх порталĕпе те усă курайратпăр», - теççĕ ял çыннисем.
Паянхи кун çыхăнусăр май çукккине лайăх ăнланатпăр. Çĕнĕ коронавирус инфекцийĕ алхаснă вăхăтра пурăннă май васкавлă медицина пулăшăвĕпе те малтанхипе танлаштарсан самай ытларах усă курма тивет. Медиксен вара медицина пулăшăвĕпе тивĕçтернĕ вăхăтра пысăк хăвăртлăхлă Интернет çыхăнăвĕпе усă курса планшетсемпе ĕçлемелле. Кăçал Анаткасри пек станци республикăри 5 ялта хăпарса ларнă, çитес çул ку енĕпе Интернет çук ытти ялсенче те ĕçлеме палăртнă.
Э.МИХАЙЛОВА.
Сăнÿкерчĕкĕсем И.Данилован.
