1989 çулхи февралĕн 15-мĕшĕнче Совет çарĕсен юлашки колоннине Афганистан çĕрĕ çинчен илсе тухнăранпа кăçал 33 çул çитрĕ. Çапла Совет Союзĕшĕн 10 çул ытла пынă вăрçă вĕçленнĕ. Раççей çар историйĕнче çак датăна астăвăм кунĕ тесе йышăннă, пире вăл Афган вăрçинчен таврăнман 14 пин ытла совет салтакĕсемпе офицерĕсем çинчен аса илтерсех тăракан кун. Çак кун Афганистан вăрçин ветеранĕсене кăна мар, çĕршыв тулашĕнчи 30 яхăн хирĕç-тăрăва хутшăннă вырăс салтакĕсене те аса илеççĕ.
Афганистан вăрçине Вăрмар районĕнчен 200 ытла çын хутшăннă, вĕсенчен 7-шĕ çапăçу хирĕсенче ĕмĕрлĕхех куçĕсене хупнă.
Çамрăклах пуçĕсене хунă интернационалист-салтаксене асăнса Афган вăрçин ветеранĕсем кашни çулах февралĕн 15-мĕшĕнче Вăрмар поселокĕнчи интернационалист-салтак палăкĕ умĕнче пур йышпа туслăн пухăнаççĕ, хăйсен ентешĕсене асăнса чыс тăваççĕ. Кăçал та çак таса тивĕçе пурнăçларĕç вĕсем. Мероприятие Вăрмар район пуçлăхĕ Ю.Иванов, район администарцийĕн пуçлăхĕ Д.Иванов, Вăрмар хула тăрăхĕн администрацийĕн пуçлăхĕ А.Петров, райадминистрацин вĕрентÿпе çамрăксен политикин управленийĕн начальникĕ Н.Иванова, Вăрмарти Г.Е.Егоров ячĕллĕ вăтам шкулта вĕренекенсем хутшăнчĕç. Шкул ачисем асăну палăкĕсем умне чăрăш лăссисенчен тунă гирлянда хучĕç. Аслисем вара - чĕрĕ гвоздикăсем. Асăну палăкĕсем умĕнче аслă класра вĕренекенсем караул тăчĕç.
Çĕлĕкĕсене хывса пухăннисем пурте Афганистан вăрçинче вилнĕ ентешĕсене шăплăх минучĕпе асăнчĕç.
Э.МИХАЙЛОВА.
