Январĕн 25-мĕшĕнче Чăваш Республикин Пуçлăхĕн Олег Николаевăн пресс-конференцийĕ иртрĕ. Олег Алексеевич республикăри журналистсен ыйтăвĕсем çине хуравларĕ. Район хаçачĕсен журналисчĕсем çак мероприятие дистанци мелĕпе хутшăнса ыйтусем пачĕç.
Вăрмар районĕнчен те икĕ ыйту пулчĕ Чăваш Ен Пуçлăхĕ валли. Пĕрремĕшĕ ку вăл «Аниш» автоçулăн Вăрмар кукринчен пуçласа Вăрмар поселокĕ еннелле 15 км çул участокне капиталлă юсав тăвассипе çыхăннă ыйту пулчĕ. Олег Николаев çак çул участокне Çул-йĕр ĕçĕсен планне кĕртнине палăртрĕ. «Хăрушлăхсăр тата пахалăхлă çулсем» наци проекчĕпе килĕшÿллĕн çак участока капиталлă юсав тума палăртнă. Хальхи вăхăтра программăпа килĕшÿллĕн 2023 çулта 25,7 миллион тенкĕ, 2024 çулта — 200 миллион тенкĕ уйăрма палăртнă. Проект çирĕплетмелли тапхăрта.
Иккĕмĕш ыйтăвĕ Арапуçĕнче çĕнĕ шкул тăвас ыйтупа ĕçсем еплерех йĕркеленсе пыни çинчен пулчĕ. Республика Пуçлăхĕ О.Николаев каланă тăрăх, паянхи кун тĕлне «Ял тăрăхĕсен комплекслă аталанăвĕ» программăна хутшăнма 2023-2024 çулсем валли заявка тăратнă. Патшалăх экспертизин пĕтĕмлетĕвĕ тăрăх строительство хакĕ 386 824 пин тенкĕ. Программăна хутшăнмалли результатсем кăçалхи июнь-июль уйăхĕсенче паллă пулаççĕ.
Олег Николаев çынсене хумхантаракан чылай ыйту çине тĕплĕ хуравсем пачĕ, критикăна йышăнма яланах хатĕр пулнине те уççăнах палăртрĕ.
