2021 çулта Республика кунне чăваш Енре пĕрремĕш хут «Эпĕ — хĕрарăм» конкурс иртрĕ. Ăна йĕркелесе ирттерсе ярканĕсем — Чăваш Енри хĕрарăмсен канашĕ тата «Пĕрле» аталану фончĕ. Тĕрлĕ сферăри хĕрарăмсем хăйсем çинчен видеопрезентацисем кăтартнă. Унта вĕсем хăйсен çемйи, професси тата мĕнпе кăсăкланни пирки каласа панă. Республикăра çакăн пек хăюллă, хăйпе паллаштарма именмен 351 хĕрарăм тупăнчĕ. Çак роликсене Чăваш Республикин халăх контролĕн порталĕнче сасăлава вырнаçтарнă пулнă.
Конкурса Вăрмар районĕнче пурăнакан, яваплă вырăнсенче ĕçлекен хĕрарăмсем те хутшăннă: «Свебрата» тулли мар яваплă обществăн генеральнăй директорĕ Е.Орлова, «РОСГОССТРАХ» страховани компанийĕн Чăваш Енри филиалĕн Вăрмар районĕнчи страховани уйрăмĕн руководителĕ И.Алексеева, районти культура аталанăвĕн центрĕн директорĕ Л.Агеева, Кĕтеснерти библиотека заведущийĕ С.Скворцова, Вăрмарти халăхăн социаллă ыйтăвĕсене тивĕçтерекен комплекслă центрăн çемьепе ачасене пулăшу кÿрекен уйрăмĕн психологĕ Н.Александрова, Кавалти пĕтĕмĕшле пĕлÿ паракан тĕп шкулта чăваш чĕлхипе литературине вĕрентекен Н.Авакова.
Конкурс 2022 çулта та пулĕ, ăна апрель уйăхĕнчех старт парĕç. Унăн тĕллевĕ — хĕрарăмăн обществăри пĕлтерĕшне, Чăваш Республикин ăнăçлăхне ÿстересси. Конкурс процедурин кăçалхи уйрăмлăхĕ — номинацисен шутне ÿстерни, халĕ вĕсем улттă: «Мы строим нашу экономику» /промышленноç, строительство, транспорт, суту-илÿ, халăхăн йăлари ыйтăвĕсене тивĕçтересси, банк ĕçĕ\, «На страже закона» /право хуралĕ тата çар служби\, «К знаниям без барьеров» /вĕрентÿ, социаллă пулăшу, физкультура, спорт\, «В интересах общества» /журналистика, патшалăх тата муниципаллă служба\, «Свое, Чувашское, родное» /ял хуçалăхĕ тата çутçанталăк\.
Конкурса хутшăнмалли заявкăсене тата видеопрезентацисене апрелĕн 25-мĕшĕнчен пуçласа май уйăхĕн 25-мĕшĕччен йышăнаççĕ. Икĕ минута тăсăлакан презентацире профессипе обществăри тата килти ĕçе еплерех ĕлкĕрсе пыни çинчен каласа памалла. Хĕрарăмсемшĕн июнĕн 1-15-мĕшĕсенче сасăлама май пулĕ, пĕтĕмлетÿсем — июнĕн 16-18-мĕшĕсенче.
Кашни номинацире пĕрремĕш, иккĕмĕш, виççĕмĕш вырăнсене онлайн сасăлав вăхăтĕнче пухăннă сасăсене шута илсе палăртĕç. Çĕнтерÿçĕсене савăнăçлă лару-тăрура июнĕн 24-мĕшĕнче Республика кунне чыслама йышăнă.
