Çĕнтерÿçĕ-салтак палăкĕ умĕнче иртнĕ митинга хутшăннă кашни çыннăн чун-чĕрине Аслă Çĕнтерÿ кунĕпе çыхăннă туйăмсем тултарчĕç. Коронавирус инфекцийĕпе çыхăннă лару-тăрăва пула икĕ çул Çĕнтерÿ кунне тивĕçлипе кĕтсе илеймерĕмĕр. Кăçал вара вăл çÿллĕ шайра иртрĕ. Митинга Вăрмар хула тăрăхĕн администрацийĕн пуçлăхĕ А.Петров уçрĕ. Раççей Федерацийĕн тата Чăваш Республикин гимнĕсен мăнаçлă янăранăвне пурте хутшăнчĕç темелле, пĕрле юрларĕç. Район администрацийĕн пуçлăхĕ Д.Иванов хăйĕн сăмахĕнче Вăрмар районĕнчи вăрçă паттăрĕсен ячĕсене ятран каласа тухрĕ, историре çырăнса юлнă паттăрлăх паянхи ăрушăн тĕслĕх вырăнĕнче пулнине палăртрĕ. Район çыннисене уяв ячĕпе ЧР строительствăпа архитектура, пурăнмалли çурт-йĕрпе коммуналлă хуçалăх министрĕн пĕрремĕш заместителĕ В.Максимов, Вăрмарсен Шупашкарти ентешлĕхĕн президенчĕ И.Аверьянов, ЧР Патшалăх Канашĕн депутачĕ Л.Пронин килсе çитнĕ. Кашниех вĕсем Раççей халăхĕн чун-чĕре хăватне никам та çапса аркатайманнине, пурте пĕрле кирек епле йывăрлăха та парăнтарма пултарнине палăртрĕ.

{gallery}albums/2022/May/Miting{/gallery}