2002 çултанпа Вăрмар районĕнче Раççей тава тивĕçлĕ спорт мастерĕн С.В.Захарован парнисене çĕнсе илессишĕн çăмăл атлетика кросĕ енĕпе ăмăртусем иртеççĕ.
Кăçал çăмăл атлетика кросĕ Энĕшпуç ялĕнче иртрĕ. Ăна Аслă Çĕнтерĕве 77 çул, Раççей пушар хуралĕ пулса кайнăранпа 373 çул, Вăрмар районĕнчи пушар хуралĕ пулса кайнăранпа 63 çул çитнине, Вăрмар районĕ пуçланса кайнăранпа 95 çул çитнине халалларĕç.
Мероприятине уçса Вăрмар район администрацийĕн пуçлăхĕ Д.Иванов тухса калаçрĕ. «Энĕшпуç ялĕнчен Чăваш Ен тата Раççей тулашĕнче палăрнă спортсменсем сахал мар тухнă. Вĕсем хушшинче — Атайкасси ялĕнче çуралса ÿснĕ Светлана Захарова. Унăн çĕнтерĕвĕсемпе, çитĕнĕвĕсемпе хавхаланса чылай шкул ачи, çамрăксем спортпа туслашнă. Эпир паллă ентешĕмĕрпе мăнаçланатпăр», — терĕ вăл.
Ăмăртусен торжествăлла пайĕнче хисеплĕ хăнасем пулчĕç: РФ тава тивĕçлĕ спорт мастерĕ, Вăрмар районĕн Хисеплĕ гражданинĕ С.Захарова, ЧР Патшалăх Канашĕн депутачĕ Ю.Зорин, Энĕшпуç ял тăрăхĕн пуçлăхĕ А.Яковлев, Вăрмарсен Шупашкар хулинчи ентешлĕхĕн вице-президенчĕ, Вăрмар районĕн Хисеплĕ гражданинĕ В.Нягин тата ыттисем те. Вĕсем спортсменсене ăнăçлă стартпа çĕнтерÿллĕ финиш сунчĕç.
Ăмăртăва хутшăнакансене Светлана Захарова та ырă сăмахсемпе хавхалантарчĕ. Вăл спортри çитĕнĕвĕсем патне мĕнле çулпа утнине каласа пачĕ, Энĕшпуçĕнчи шкулта вĕреннине палăртрĕ. Физкультура вĕрентекенĕ Г.Исаев /халĕ Чăваш Республикин тава тивĕçлĕ тренерĕ\ Светлана Владимировнăн пултарулăхне курса уроксенче унăн талантне тĕллевлĕн аталантарнă. Пĕрремĕш хут Светлана Васильева /хĕр чухнехи хушамачĕ\ 6-мĕш класра вĕреннĕ чухне шкул шайĕнчи ăмăртура çĕнтернĕ, ун хыççăн вара район, республика, çĕршыв шайĕнчи тата ытти ăмăртусенче те малти вырăнсене йышăннă.
Ăмăртусем пуçланиччен Пысăк Енккассинчи пĕтĕмĕшле пĕлÿ паракан вăтам шкулти кадетсем, пушар хуралĕн сотрудникĕсем 1418 утăмпа танлашакан символлă дистанцие утса тухрĕç, мĕншĕн тесен Аслă Отечественнăй вăрçă шăпах 1418 куна тăсăлнă.
Çăмăл атлетика эстафетине халăх йышлă хутшăнчĕ. Старта пĕчĕккисенчен пуçласа аслă ÿсĕмрисем таранах туслăн тухрĕç. Çĕнтерÿçĕсемпе призерсене дипломсемпе, медальсемпе, хаклă парнесемпе чысларĕç. Районти 39-мĕш пушарпа çăлав чаçĕн ĕçченĕсем те спорт мероприятийĕнчен айккинче юлмарĕç, хăйсен ÿсĕмĕнчи ушкăнсенче малти вырăнсене йышăнчĕç.
Н.ШИШКИНА.
