Чăваш Республикинче 12 наци проекчĕ пурнăçланать, вĕсенчен 9-шĕ — Вăрмар районĕнче. Вĕсен ячĕсем те хăйсем çинчен калаççĕ: «Пурăнмалли çурт-йĕр тата хула тăрăхĕ», «Хăрушсăрлăхлă тата пахалăхлă çулсем», «Экологи», «Сывлăх сыхлавĕ», «Культура», «Вĕрентÿ», «Демографи», «Вак тата вăтам предпринимательлĕх», «Ĕç тухăçлăхĕ тата халăха ĕçпе тивĕçтересси».
Наци проекчĕсен тивлечĕпе Вăрмар районĕнче чылай калăпăшлă ĕçсем пурнăçланса пычĕç. Шкулсенче «Точка роста» кабинетсем, ялсенче ФАПсем хута кайрĕç, поселокра футбол уйĕ уçăлчĕ, Культурăпа кану паркĕнче ГТО площадки сывă пурнăç йĕркине кăмăллакансене илĕртет тата ытти ĕçсем те. Федераци шайĕнчи кашни проектăн регионти проекчĕсем пур. Акă «Пурăнмалли çурт-йĕр тата хула тăрăхĕ» наци проекчĕн регион шайĕнчи проекчĕсен шутне «Пурăнмалли çурт-йĕр», «Хăтлă хула тăрăхне йĕркелесси», «Чăваш Республикинче пурăнма юрăхсăр çурт-йĕр фондне чакарассине тивĕçтересси» ятлисем кĕреççĕ. Хальхи вăхăтра шăпах «Хăтлă хула тăрăхне йĕркелесси» регион проекчĕпе килĕшÿллĕн çитес çул поселока хăтлăх кĕртсе илем кÿрес тĕллевпе «Госуслуги» сайтра е za.gorodsreda.ru платформăра сасăлав пырать. Сасăлав май уйăхĕн 30-мĕшĕччен пырать. 2023 çулта Вăрмар поселокĕнчи пĕр территорие — тĕп площаде хăтлăх кĕртме сĕнеççĕ. Списокран хăтлăх кĕртмелли пĕр территорие суйласа илмелле. Федераци проекчĕ шайĕнче уйăракан укçа-тенкĕне чи нумай сасă пухакан объекта тума ярĕç. Вăрмарсене сасăлава хутшăнма пулăшас тĕллевпе районта волонтерсем ĕçлеççĕ. Вĕсем район администрацийĕн пĕрремĕш хутĕнче, канмалли кунсемсĕр пуçне, кашни кунах сасăлава хутшăнма пулăшаççĕ. Кашни сасă пĕлтерĕшлĕ, çавăнпа та кашниех сасăлава хутшăнар!
Çавăн пекех «Чăваш Республикинче пурăнма юрăхсăр çурт-йĕр фондне чакарассине тивĕçтересси» регионти проектпа килĕшÿллĕн граждансене пурăнма юрăхсăр авариллĕ çурт-йĕртен куçарас тĕллевпе Вăрмар поселокĕнчи Порфирьев урамĕнче нумай хваттерлĕ çĕнĕ çурт хăпартса лартма палăртнă. Поселокри Вокзальная урамри 14-мĕш çурт авариллĕ шутланать, унта 14 çын пурăнать. Чăваш Республикин Строительствăпа архитектура тата пурăнмалли çурт-йĕрпе коммуналлă хуçалăх министерствипе тунă килĕшÿ тăрăх граждансене 2023 çулхи декабрĕн 31-мĕшĕччен çĕнĕ çурта пурăнма куçармалла.
Çапла наци проекчĕсем Вăрмар районĕнче ăнăçлă пурнăçланса пыраççĕ, район çыннисен пурнăç условийĕсене лайăхрах тума пулăшаççĕ.
Э.МИХАЙЛОВА.
