Чăваш Республикинчи ачасемпе çамрăксен библиотекин пуçарулăхĕпе, ЧР культура, национальноç ĕçĕсен тата архив ĕçĕн министерстви пулăшнипе май уйăхĕнче республикăра «Чи нумай вулакан çемье» конкурс иртнĕ. Унăн тĕп тĕллевĕ — çемьесенче кĕнеке вулассине аталантарасси.
Конкурса республикăри библиотекăсен чи активлă вулаканĕсем хутшăннă. Вĕсем «Вулакан çемьен видеовизитки» тата «Художествăлла произведенин тĕп шухăшĕ тăрăх йĕркеленĕ инсценировка» номинацисенче пурĕ 46 ĕç тăратнă.
Çемьесем хăйсен ĕçĕсене питĕ интереслĕ хатĕрленĕ. Ачасемпе ашшĕ-амăшĕсем чăваш тата вырăс çыравçисен хайлавĕсенчи, халăх юмахĕсенчи сăнарсене выляса видеороликсем ÿкернĕ.
Конкурса тăратнă ĕçсене жюри хакланă: «Чăваш Республикинчи профессионаллă çыравçăсен Союзĕ» обществăлла организацин председателĕ Улькка Эльмен, çак организацин членĕ Раиса Васильевна Воробьева сăвăç, Чăваш Республикинчи ачасемпе çамрăксен библиотекин специалисчĕсем. Çак конкурса Кавал ялĕнчи Артюковсен çемйи те хутшăнса чи пултаруллисен йышне кĕнĕ. Артюковсем /Валерий Михайлович, Надежда Михайловна, Екатерина, Анастасия, Максим\ «Вулакан çемьен видеовизитки» номинацинче 2-мĕш вырăн йышăннă. Конкурс çĕнтерÿçисене июнĕн 1-мĕшĕнче, Ачасене хÿтĕлемелли пĕтĕм тĕнчери кунра, Чăваш Республикинчи ачасемпе çамрăксен библиотекинче чысланă. Артюковсем Диплома тата хаклă парнене тивĕçнĕ /ÿкерчĕк çинче\.
Т.ТАРАТИНА, Кавалти библиотека заведующийĕ.
