Июлĕн 1-мĕшĕнче Куславкка районĕнчи Куснар ялĕ çывăхĕнче «Чĕмсĕр чикĕсен строителĕсене» мемориал комплексне торжествăлла лару-тăрура уçрĕç. Çак астăвăм палăкĕ Совет Союзĕн çыннисен Аслă Отечественнăй вăрçи вăхăтĕнчи паттăрлăхне çирĕплетекен Раççейри пĕрремĕш мемориал пулса тăчĕ. Ăна кĕске вăхăтра хăпартса лартма пултарнă. Шăпах та 1941 çулхи июль уйăхĕн пĕрремĕшĕнче «Правда» хаçатра «Все для фронта, все для победы!» ятпа статья пичетленсе тухнă пулнă. Çапла июлĕн 1-мĕшĕ тыл ĕçченĕсене чысламалли кун. Мероприяти чи малтанах Мускавран илсе çитернĕ Ĕмĕр сÿнми çулăма чĕртсе янинчен пуçланчĕ. Астăвăм палăкне уçма РФ Президенчĕн Атăлçи округĕнчи полномочиллĕ представителĕ И. Комаров, Федераци Канашĕн председателĕн заместителĕ Н. Журавлев, ЧР Пуçлăхĕ О.Николаев, Патшалăх Думин депутачĕ А. Аксаков, Тутарстан Президенчĕ Р.Минниханов тата ыттисем те хутшăнчĕç. Республикăра пурăнакансем йышлă пухăннă çак пысăк та пĕлтерĕшлĕ мероприятие. Район администрацийĕсен делегацийĕсем те, çав шутра Вăрмар район çыннисем те, район пуçлăхĕ Ю.Иванов, район администрацийĕн пуçлăхĕ Д.Иванов ертсе пыракан делегаци те, ытти район çыннисем те асра юлмалли пулăма хутшăнса историе кĕрсе юлчĕç. Пурте вĕсем çакăн пек масштаблă пулăма хутшăнма май пурришĕн кăмăллă пулчĕç.
Мемориал комплексĕнче йăлтăр-ялтăр çутатса тăракан тимĕртен туса лартнă 38 стела, районсемпе хуласен символикине сăнлакан гранитран тунă 26 стела, йывăçсен аллеисем — пурне те Сăрпа Хусан хÿтĕлев чиккисене тунă çĕрте йывăр условисенче, шартлама сивĕре ĕçленĕ тылри паттăрлăха халалланă. Кунта пурин те пулса курмалла, астăвăм палăкĕпе паллашмалла.
{gallery}albums/2022/01.07.22{/gallery}
Э.МИХАЙЛОВА.
