Кăçал Вăрмар районĕн Акатуйĕнче йĕркеленĕ «Ăстасен хули» ÿнер тата ал ĕç ăстисен куравĕнче район çыннисемпе уяв хăнисем Тикаш ялĕнче çуралса ÿснĕ Нина Алексеевна Александровăн илемлĕ картинисене курса киленме, вĕсене туянма пултарчĕç. Çак картинăсем умĕнчен ахаль кăна иртсе кайма çук, тĕрлĕ тĕссемпе, хăйнеевĕрлĕхĕпе куçа илĕртеççĕ вĕсем, чунра лăпкăлăх çуратаççĕ, илемлĕх туйăмне вăратаççĕ. Тÿрех паллă — пысăк талантлă çын алли ÿкернĕ вĕсене, картинăсем урлă хăйĕн чунри туйăмĕсене палăртнă.
Пултаруллă художникпе кăштах паллашар-ха. Нина Алексеевна Александрова 1960 çулхи августăн 12-мĕшĕнче Тикаш ялĕнче кун çути курнă. 1975 çулта Тикашри сакăр çул вĕренмелли шкула пĕтернĕ. 1975-1979 çулсенче Шупашкарти строительство техникумĕнче пĕлÿ илнĕ.
Техникумран вĕренсе тухнă хыççăн çемье çавăрса Чăваш Енрен тухса кайнă. Мăшăрĕ çар çынни пулнă май унпа пĕрле Мурманск облаçĕнче çар гарнизонĕсенче пурăннă, хăй те контрактпа çар службинче тăнă. Халь вăл çар пенсионерĕ, çар службин ветеранĕ. Пуринчен ытла Нина Алексеевна ÿкерме юратать, ачаранах ÿкерет. Ку енĕпе ятарласа пĕлÿ илмен пулин те пултарулăхĕпе тĕлĕнтерет. 2002 çулта вăл Хеннес Руиссинг кăларнă «Полный курс масляной живописи» кĕнекене туяннă та çуллă сăрăпа картинăсем ÿкерме пуçланă. Тĕрлĕ техникăпа ÿкерсе пăхнă, анчах çуллă сăрăпа ÿкернĕ картинăсем ытларах килĕшеççĕ ăна. Паллă художниксен копийĕсене ÿкернĕ. Унăн пĕрремĕш копийĕ — М.Врубелĕн «Царевна-лебедь» картини.
2004 çултанпа, хупă çар хулинче пурăннă чухне, Нина Алексеевна çулсерен хулара иртекен «Ылтăн алăсем» курава хутшăнса призлă вырăнсене йышăннă. 2006 çулта вара хăйĕн уйрăм куравĕ иртнĕ. Унта унăн картинисемпе кăна мар, вăл хăй аллипе ăсталанă урăх япаласемпе те — çĕленĕ, çыхнă япаласемпе тата ыттипе те — паллашма пулнă.
2014 çултанпа Нина Алексеевна тивĕçлĕ канура, 2017 çултанпа Шупашкар хулинче пурăнать. Яланах шыравра вăл, Интернетпа усă курса тĕрлĕ художниксенчен вĕренсе хăйĕн ăсталăхне туптать, хăйне тĕрлĕ техникăра тĕрĕслесе пăхать. Çавăн пекех кăранташпа, пастельпе ÿкерме кăмăллать.
И.ДАНИЛОВА.
