Хăмла тупăшлă культура тесе мĕн авалтанпах каланă. Çакна тĕпе хурса пирĕн район территорийĕнче хăмла çитĕнтерме тытăннă. Ку ĕçе «АгроРесурсы» тулли мар яваплă общество йĕркелесе пырать. Унăн учредителĕ - А.Вальшников.
Иртнĕ кунсенче район администрацийĕн пуçлăхĕн АПК тата экономика аталанăвĕ енĕпе ĕçлекен заместителĕ — ял хуçалăхĕпе экологи пайĕн начальникĕ Н.Николаев, ЧР Ял хуçалăх министерствин растениеводство, механизаци, химизаци тата ÿсен-тăрансене хÿтĕлес енĕпе ĕçлекен пайĕн консультанчĕ Н.Павлов Кĕтеснер тата Кавал ял тăрăхĕнче çитĕнекен хăмла участокĕсене çитсе курса унăн учредителĕпе А.Вальшниковпа ĕçлĕ тĕлпулу ирттернĕ. 14 гектар çинче çитĕнекен хăмла участокĕнчи ĕç-хĕлпе паллашнă.
Хăмла шпалерĕ çакнă участоксем районта пĕтĕмпе 38 гектар, вĕсенчен 30 гектарĕ çимĕç параканни. 2021 çулта 6 гектар çинче çамрăк хунавсем лартса хăварнă, вĕсенчен 2 гектарĕ Мăнçырмара, 4 гектарĕ - Кĕтеснер ялĕнче.
Ĕçлĕ ушкăн малаллахи ĕç планĕсене сÿтсе яврĕ, кунта вăй хуракансене çăмăл мар ĕçре ăнăçу, чăтăмлăх, сывлăх сунчĕ.
С.ЕФРЕМОВА, район администрацийĕн ял хуçалăхĕпе экологи пайĕн ертсе пыракан специалист-эксперчĕ.
