Иртнĕ кунсенче ĕçлĕ визитпа Вăрмар районĕнче Чăваш Республикинчи ачасен прависен уполномоченнăйĕ Алевтина Федорова пулнă.
Чи малтанах вăл Вăрмар хула тăрăхĕн пуçлăхĕпе А.Петровпа, РФ ШĔМĕн муниципалитетсем хушшинчи «Урмарский» уйрăмĕн çул-йĕр патшалăх инспекцийĕн пайĕн начальникĕпе Е.Георгиевпа, Вăрмар районĕнчи ачасен прависемпе ĕçлекен уполномоченнăйĕпе И.Алексеевăпа, райадминистрацин вĕрентÿпе çамрăксен политкин управленийĕн начальникĕн заместителĕпе Н.Ивановăпа, Чăваш Енри хĕрарăмсен канашĕн Вăрмар районĕнчи уйрăмĕн председателĕпе В.Волковăпа чи малтанах ЧР Ĕçлев министерствин Вăрмарти халăха социаллă пулăшу кÿрекен комплекслă социаллă центрĕнче пулнă. Кунта вĕсене центр директорĕ Ж.Дмитриева иккĕмĕш хутри ачасем, персонал валли уйăрнă пÿлĕмсемпе паллаштарнă. Хальлĕхе центрта ачасем çук, Алевтина Федорова вĕсене кунта усрамалли условисемпе паллашрĕ. Комплекслă центрпа çывăхрах шкул, бассейн та вырнаçнă. Вĕренÿ çулĕ пуçлансан ачасем нумай çÿреме пуçлаççĕ, çавăнпа та кунта çул-йĕр хăрушсăрлăхĕ çине уйрăмах тимлĕх уйăрмалла. Кĕçĕн классене вĕрентекен пуçламăш шкултан тухнă çĕрте «Илем» физкультурăпа спорт комплексĕ еннелле çул урлă каçнă вырăнта шурă сăрăпа паллă тума хатĕрленеççĕ сентябрĕн 1-мĕшĕ тĕлне. Ĕçлĕ ушкăн çул-йĕр хăрушсăрлăхĕпе çыхăннă ыйтусене сÿтсе явнă. Алевтина Федорова çул-йĕр паллисене тимлĕ сăнаса пăхнă. Çул-йĕр патшалăх инспекцийĕн пайĕн начальникĕ Е.Георгиев палăртнă тăрăх, профилактика мерисене çирĕп пăхăннăран çул-йĕр çинче ачасен айăпĕпе çыхăннă пăтăрмахсем пулман.
Çавăн пекех вăл поселокри ача-пăча площадкипе, культурăпа кану паркĕпе, ачасен хăрушсăрлăх правилисене еплерех пăхăннипе паллашрĕ. Ĕçлĕ çулçÿреве пĕтĕмлетнĕ май Алевтина Федорова çул çитмен ачасен хăрушсăрлăхĕпе çыхăннă çитменлĕхсене пĕтерме хушнă.
Э.МИХАЙЛОВА.
