Юлашки шăнкăрав сасси... Выпускниксемшĕн вăл — пурнăçа икке пайлакан хăйне евĕрлĕ символ. Шухă ачалăх хыçа юлать, умра — тĕллевсене палăртса вĕсене пурнăçлама, хамăршăн хамăр яваплă пулма хăнăхмалли тапхăр.

Майăн 23-мĕшĕнче, округри ытти шкулсенчи пекех, Вăрмарти Г.Е.Егоров ячĕллĕ пĕтĕмĕшле пĕлÿ паракан вăтам шкулта 9 тата 11 классенчен вĕренсе тухакансем валли юлашки шăнкăравăн уçă сасси янăрарĕ.

Çанталăкĕ ăшă тăнăран мероприяти шкул стадионĕнче иртрĕ. Илемлĕ кĕвĕпе 11а, 11б, 11в классенчен вĕренсе тухакансем хăйсен класс руководителĕсемпе пĕрин хыççăн тепри утса тухса хăйсен вырăнне йышăнчĕç. Яшсем те, хĕрсем те илемлĕ тумсемпе, аллисенче тĕрлĕ тĕслĕ шарсем.

Раççей тата Чăваш Ен Гимнĕсем янăранă май пурте пĕр хушă шăпланса тăчĕç, унтан мероприятине хутшăннă яваплă çынсем сăмах илчĕç. Шкул директорĕ Петр Алексеев, Вăрмар муниципаллă округĕн пуçлăхĕ Василий Шигильдеев, унăн социаллă ыйтусемпе ĕçлекен заместителĕн — вĕрентÿпе çамрăксен политикин пайĕн начальникĕн тивĕçĕсене пурнăçлакан Виктор Павлов, Вăрмарти территори пайĕн начальникĕн тивĕçĕсене пурнăçлакан Александр Виссарионов, Вăрмар муниципаллă округĕн прокурорĕн заместителĕ Павел Емельянов, Тихвински Турамăш турăшĕн Мăнçырмари чиркĕвĕн настоятелĕ Леонид Ермолаев протоиерей, Вăрмар муниципаллă округĕн депутачĕсен Пухăвĕн депутачĕ Геннадий Егоров тата ыттисем те выпускниксене патшалăх экзаменĕсене ăнăçлă тытма, суйласа илнĕ вĕренÿ заведенийĕсене вĕренме кĕрсе малалла тарăн пĕлÿ илме, пурнăçра хăйсен вырăнне тупма, ыттисене вара çуллахи каникулта лайăх канса вăй-хал пухма сунчĕç. Унтан шкулта вĕренекен активлă ачасене, тĕрлĕ шайри олимпиадăсен çĕнтерÿçисемпе призерĕсене, хăйсен ĕçĕнче палăрнă вĕрентекенсене тĕрлĕ наградăсемпе чысларĕç.

1-мĕш класран вĕренсе тухакан ачасем хаваслă сăвăсемпе савăнтарчĕç. Çавăн пекех чунри туйăмĕсене палăртса выпускниксен класс руководителĕсем, пĕрремĕш вĕрентекенĕсем чĕрене пырса тивекен сăмахсем каларĕç.

Йăлана кĕнĕ йĕркепе выпускниксем класăн-класăн тухса юрларĕç, пурте пĕрле ташларĕç. Унтан юлашки шăнкăрав вăхăчĕ те çывхарчĕ. 11б класри Владислав Даниловпа 1г класри Софья Николаева шăнкăрава шăнкăртаттарса пухăннисен умĕнчен утса çаврăнчĕç.

Ирина ДАНИЛОВА

Вăрмар муниципаллă округĕнче 2022-2023 вĕренÿ çулĕнче юлашки шăнкăрав 9 класра вĕренекен 223 ача валли, 11 класран вĕренсе тухакан 83 ача валли хăйĕн сассине пачĕ.

Добавить комментарий