Сывă пурнăç йĕркине тытса пыракансем Çĕнĕ çулхи тата Раштаври канмалли кунсенче те ăшă пÿртре ахаль лармаççĕ. Вăрмар округĕнче Спорт тата сывлăх декади пынă май, спортпа туслă çынсем тĕрлĕ ăмăртусене хутшăнма, йĕлтĕрпе, конькипе ярăнма, бассейна çÿреме пултараççĕ.
Паян, акă, Вăрмар поселокĕнчи тĕп стадионта йĕлтĕрпе чупассипе Раштав ăмăртăвĕсем иртрĕç. Унта чи хастар та пултаруллă йĕлтĕрçĕсем хутшăнчĕç. Вĕсен хушшинче вăрмарсем кăна мар, тăвайсем те пулчĕç.
Пухăннисене спорт уявĕ ячĕпе Вăрмар муниципаллă округĕн администрацийĕн пуçлăхĕн пĕрремĕш заместителĕ Николай Павлов, культура, социаллă аталану тата спорт пайĕн начальникĕ Александр Краснов, А.Ф.Федоров ячĕллĕ Вăрмарти спорт шкулĕн директорĕн тивĕçĕсене вăхăтлăх пурнăçлаканĕ Игорь Соколов, ăмăртусен тĕп судйи Александр Ноздрин саламларĕç, ăнăçу сунчĕç.
Йĕлтĕр йĕрĕ çине шкул ачисем те, çамрăксем те, ветерансем те туслăн тăчĕç, ÿсĕмне кура черетпе ăмăртрĕç. Çĕнтерÿ пьедесталĕ çине хăпарма чи хăвăрттисем тивĕçрĕç. Вĕсене грамотăсемпе тата медальсемпе наградăларĕç.

Добавить комментарий