Аслă Çĕнтерÿ уявĕ - Раççейре пурăнакансемшĕн чи паллă кун. Аслă Отечественнăй вăрçă çĕршыври кашни çемьене шар кăтартнă, никама та шеллемен. Кашни килтенех фронта е ашшĕ, е аслашшĕ, е пиччĕшĕ тухса кайнă, вăрçă хирĕнче çапăçнă, хăшĕсем аманнă, нумайăшĕ пуçне хунă... Вĕсен паттăрлăхĕ вилĕмсĕр.

Майăн 9-мĕшĕнче Вăрмар поселокĕнче Аслă Çĕнтерÿ 76 çул тултарнине халалласа район çыннисем асăну палăкĕсем, асăну хăмисем умне чĕрĕ чечексем, чечек кăшăлĕсем хучĕç. Иртнĕ çулсенчипе танлаштарсан уяв парачĕсĕр иртрĕ çак кун, митинг та пулмарĕ. Апла пулин те кашнин чунĕсенче Çĕнтерÿ кунĕшĕн хĕпĕртени, унпа мăнаçланни палăрчĕ. Поселокра иртенпех вăрçă тематикипе янăракан юрă-кĕвĕ майăн 9-мĕшĕн кунĕ календарьте уйрăмах паллă вырăн йышăннине туйтарчĕ.

Чи малтанах Вăрмарти шкулта вĕреннĕ, Аслă Отечественнăй вăрçа хутшăнса пуçĕсене хунă вĕрентекенсемпе шкул ачисен ячĕпе лартнă палăк умне Вăрмарти Г.Е.Егоров ячĕллĕ вăтам шкулти кадет класĕнче вĕренекенсем гирлянда хучĕç, караул тăчĕç. Вĕсем хыççăн Вăрмар район пуçлăхĕ Ю.Иванов, райадминистраци пуçлăхĕ Д.Иванов, «Вăрмарсен Шупашкарти ентешлĕхĕ» обществăлла организаци президенчĕ И.Аверьянов, районти вĕрентÿпе çамрăксен политикин управленийĕн начальникĕ Н.Иванова, район прокурорĕ Д.Александров палăк умне чĕрĕ гвоздикăсем хучĕç. Малалла яваплă çынсем районти поликлиника çурчĕ умĕнче пуçтарăнчĕç. Çак вырăн пĕлтерĕшĕ пысăк, мĕншĕн тесен Тăван çĕршывăн Аслă вăрçин синкерлĕ кунĕсенче районта пурăнакансем — 6771 çын — фронта шăпах çакăнтан тухса кайнă, вĕсенчен 4645-шĕ тăван тăрăха таврăнайман. Поликлиника стени çине çак пулăма халалласа вырнаçтарнă Асăну хăми умне яваплă çынсем, çав шутра тĕп больницăн тĕп тухтăрĕ О.Волков та чĕрĕ чечексем, чечек кăшăлĕ пырса хучĕç.

Çавăн пекех Совет Союзĕн геройне Анатолий Казаковăн, Мухтав орденĕн тулли кавалерĕн Павел Порфирьевăн асăну хăмисем умне, Афганистан вăрçинче пуçĕсене хунă ентешсене халалласа лартнă палăк умне те яваплă çынсемпе шкул ачисем хĕп-хĕрлĕ гвоздикăсем хурса чыс турĕç.

10 сехетре район руководителĕсем, предприяти, организаци коллективĕсем, депутатсем, «вăрçă ачисем», ытти район çыннисем пурте Расул Гамзатовăн «Журавли» сăвви тăрăх хайланă юрă янăранă вăхăтра Çĕнтерÿçĕ-салтак палăкĕ умне черетпе чĕрĕ чечексем, кăшăлсем хучĕç. Вĕсен шутĕнче чи малтанах кадетсем, район ертÿлĕхĕ, ЧР Патшалăх Канашĕн депутачĕ Ю.Зорин, «Единая Россия» политика партийĕн регионти уйрăмĕн секретарĕн заместителĕ Н.Владимиров пулчĕç. Юлашкинчен пурте пĕрле тăрса аслă Çĕнтерÿ 76 çул тултарнă ятпа асăнмалăх сăн ÿкерĕнчĕç.

Э.МИХАЙЛОВА.

Добавить комментарий